I&PR Department kum 50 tlin lawmna Chief Minister hovin neih a ni

Information & Public Relations Department din kum 50-na, Golden Jubilee lawmna chu nimin khan I&PR Auditorium, Aizawl-ah neih a ni a, he hun hi Chief Minister Zoramthanga chuan hmanpuiin I&PR Department-a thawktu indaihlohna chu sawrkar sum dinhmun a ziaawm hunah sutkian a nih tur thu a sawi.

Nimin-a I&PR Department kum 50 tlin lawmna ah hian Chief Minister Zoramthanga chuan Golden Jubilee plague hawngin, Souvenir a tlangzarh a. Kum 50 tlin chu thil ropui tak a nih thu sawiin, I&PR Department a thawk mek leh a hma zawnga lo thawk tawh thin te chungah lawmthu a sawi a ni. I&PR Department chuan hmanlai atang tawhin sawrkar leh mipui rawngbawl hna pawimawh tak a thawh thin dan leh a hunlai mil zela information pekchhuah nan Media Technology hman tangkai a nih dan te Chief Minister chuan sawiin, tunlai hunah information a chak tawhin, thu pawimawh puanchhuah dan kawng chi hrang hrang a tam dan leh a awlsam tawh dante a sawi a, heng te hi a tha zawnga mitinin kan hman thiam theih nan I&PR chuan mawhphurhna a neih thu a sawi a ni. 

Chief Minister chuan mipuite hriattur a news puanchhuah chu chiang tak leh ngil tak ni thin se tiin, I&PR Department chu chanchinbu mite nen innghenghnai taka thawkho an nih angin hetiang zawngah pawh hian mawhphurhna an neih thu a sawi a. I&PR Department thawktu indaihlohna te chu a hriatpui thu sawiin, sawrkar sum dinhmun a ziaawm hunah heng harsatna te hi sutkian a nih tur thu a sawi bawk.

I&PR Department Golden Jubilee lawmna hi I&PR Director Lallianpuii chuan kaihruaiin khualzahawm nia he hun hmanpuitu I&PR Minister Lalruatkima chuan I&PR Department chu sawrkar policy hlawhtling taka a kal theih nana mipui hrilhhriat kawngah te, thuthar pawimawh tak tak puanzar te mai bakah, mipui leh sawrkar kara palai hna thawk, mipui mar dektu, hmasawnna hna tluang taka a kal theih nan a mawhphurhna lian tak nei a nih thu sawiin, “I&PR Department a chakloh chuan sawrkar pawh a chaklo a ni,” a ti. I&PR Minister chuan khawvel pumpui hrilengin a tihbuai avanga thu leng vak belhchian dawllo a tam laia mipui hnena thu rintlak puanchhuah kawnga I&PR Department thawh thatzia te sawiin, he Department in Golden Jubilee a thlen hian tuna thawkute leh a hmaa bul lo tantute hnenah lawmthu a sawi bawk a ni.

Mizoram-ah hian District Council hunlai atang khan Information Officer ruat niin bul tan a ni a. Union Territory a nih hnuah Office building neiin kum 1972 khan Department puitlingah Information and Public Relations & Tourism (IPR&T) tih hming pu-a hlankai a ni a. Tourism leh Printing & Stationery bakah he department hian Protocol hna te, Art and Culture tih hmasawn pawh a kawp tel a. Tuna Printing & Stationery Department leh Tourism Department te hi kum 1980 leh 1987 khan I&PR Department atangin an indang an ni.

Tun dinhmuah I&PR Department-ah hian Ministerial post 52 awmah post 30 luah a ni a, AVPA (Cameramen/ Protographer, etc.) post 63 ah 38 a ruak a, Group ‘A’ (Officer) post 48 ah 19 luah a ni bawk.

He hunah hian I&PR Department tobul te ngaihthlak niin he Department-a thawk tawh mi thahnem takin an hmanpui bawk a ni.