Serchhip District chu District hrang hrang zingah COVID-19 hri kai enkawllai tamna ber a ni mek

Serchhip District chu Mizoram District hrang hrang zingah COVID-19 hri kai enkawllai tamna ber ni mekin District mal-a hri kai enkawllai mi 200 aia tam awmna awmchhun a ni bawk a. Tun dinhmunah hri kai enkawllai za aia tamna District panga (5) ala awm a ni.

Information & Public Relation Department in nimin tlai dar 5:00 thlenga Mizoram District hrang hrang te COVID-19 dinhmun a tarlan ah Serchhip District hi COVID-19 hri kai enkawllai tamna ber ni mekin Serchhip District-ah hian hri kai enkawllai mi 225 an awm mek a, hetah hian nimin a hri kai hmuhchhuah thar te tarlan tel an ni lo thung a, Serchhip District dawt-a hri kai enkawllai tamna chu Aizawl District niin hri kai enkawllai 137 an awm a, Saitual District-ah 134 enkawllai la awm bawkin District mal-a hri kai enkawllai za aia tamna Lunglei (114) leh Mamit District (112) te an awm bawk a ni.

Mizoram District tinah COVID-19 hri kai enkawllai an la awm a, Siaha District chu hri kai enkawllai tlemna ber niin nimin tlai dar 5:00 thleng khan mi 12 chiah enkawllai an awm tawh a, Lawngtlai District-ah pawh mi 17 enkawl mek an la ni a, Kolasib District-ah mi 29 enkawl la niin Hahthial District-ah 36, Champhai District-ah 60 leh Khawzawl District-ah hri kai enkawllai 68 an la awm bawk a ni.

Hri kai hmuhchhuah tawh atanga za zela chhuta dam tam lamah Saitual District chu a hniam ber niin hri kai hmuh tawh atanga za zela 97.73 te chu enkawl dam an ni tawh a, Serchhip District in dawtin 98.04 enkawl dam an ni tawh a, Khawzawl District (98.74%) leh Hnahthial District (98.85%) ten an dawt a, a bak district dang zawngah chuan hri kai hmuhchhuah atanga za zela 99 aia tam enkawl dam an ni tawh a. Aizawl District chu hri kai atanga chhuta enkawl dam tamna ber niin za zela 99.53 enkawl dam an ni tawh bawk a ni.

District hrang hrang zingah Aizawl District chu hri kai hmuhchhuah zinga thi tamna ber ni mekin mi 436 an thi tawh a, hei hi za zela chhut pawhin a sang ber niin za zela 0.357 a ni a, Kolasib District in dawtin mi 43 thi tawhin 0.356% a ni thung a, Serchhip District-ah hri kai mi 33 thi tawhin hei hi hri kai hmuh atanga chhutin za zela 0.250 a ni a, Khawzawl District-ah mi 5 (0.09%) thiin thi tlemna ber District an ni bawk.