Rel kawng siam tur thulh rih

Sairang atanga Mizoram chhim tawp, Hmawng-buchhuah Rel kawng siam tum chu sum hautak vangin thulh rih a ni.

Nimin-a Lok Sabha thutkhawm ah Mizoram Lok Sabha MP, C. Lalrosanga’n ziaka zawhna a siam chu Railway Minister Ashwini Vaishnaw chuan chhangin Sairang atanga Lawng-tlai District a awm Hmangbuchhuah thlenga Rel kawng siam rawtna enfiahin Reconnaisance Engineering-cum-Traffic Survey lak a ni a, Survey atanga a lan danin Kilometre 223 a thui ni tura chhut he Broad Gauge Rel kawng siam nan hian cheng vbc. 15, 007 zet a ngai dawna chhut a ni a. A senso tur nena chhutin a hlawk loh dawn em avangin hmalak zui theih a ni ta lo tih a tarlang a. A hlawk lohna tur Rate of Return (RoR) hi minus (-) zaa 10.45 a ni tih Railways Minister chuan a sawi bawk.

Hei bakah hian zawhna dang chhangin Communications Ministry hnuaiah Mizoram-a Dak In (Post Office) 64-ah Core Banking Facility dah tum a ni tih Minister of State for Communication Devusinh Chauhan chuan House-ah a hrilh a. Rampuma Post Office zawng zawng 1,58,526 zinga 1,52,514-ah Core Banking System hi hman a ni tawhin, hei hian hmarchhak bial kilkhawr zawk leh thingtlanga Net Banking, Mobile Banking leh ATM leh Post Office Accounts khawih a ti awlsam dawn a ni, a ti bawk.