Mathematics Summer Day Camp hawnna nei

Human Resources Development (HRD) Board Vice Chairman L. Thangmawia, MLA chuan kar khat awh tur Mathematics Summer Day Camp chu nimin khan Pachhunga University College ah a hawng.

Mizoram Mathematics Society (MMS), Mizoram Science, Technology & Innovation Council (MISTIC) leh Pachhunga University Mathematics Department ten pawl 9 leh pawl 11 zir zo chiahte tana chhiarkawp zirhona runpui an buatsaih hawnna ah hian HRD Board Vice Chairman chuan Mizote zingah Mathematics hi Subject har-a ngaihna la awm bawk mah se zirtirtute an that chhoh tak zel avangin a nihna dik tak an hre chho mek zel a, zirlaite pawhin an chhiarkawp zirlaibu piah lam zir belh chakin Summer Day Camp, kum tina MMS in a buatsaih thin ah pawh an tel tha thei hle tih a sawi a ni.

He Camp-ah hian zirlai 59 telin heng te hi, pawl 9 zo chiah zirlai 24 leh pawl 11 zir zo chiah zirlai 35 an ni a, Mathematics an zir zelna tura pawimawh (advance topic) hrang hrang zirpui an nih bakah a duh tan Mathematics Help Desk te siamin mahni duh ang zirlai tin ten a bik takin an zawt thei bawk dawn a ni.