Hri kai thar 157 leh enkawl dam 152 awm belh

Mizoram-ah ni khat-a COVID-19 hri kai hmuhchhuah an tlem zel a, niminpiah khan Sample 1267 enfiah niin hri kai mi 157 hmuh an ni a, Sample enfiah atanga za zela 12.4 te chuan hri an kai a ni.

Niminpiah khan ZMC-a RT-PCR Laboratory-ah Sample 16 enfiah niin hri kai hmuh an awm lova, Lunglei-a RT-PCR Laboratory-ah Sample enfiah a  awm lo bawk. Fluorescent Immunoassay Test hmangin Serchhip District-ah Sample 5 enfiah niin hri kai mi 2 hmuh an ni a, District hrang hranga TrueNat Laboratory zingah Lunglei leh Hnahthial-ah Sample 8 enfiah awmin hri kai hmuhchhuah an awm lo bawk.

Rapid Antigen Test hmangin niminpiah khan Sample 1238 enfiah ni bawkin hri kai mi 155 hmuh an ni a, Mamit District-ah 39, Serchhip District-ah 30, Lunglei District-ah 23, Saitual District-ah 18, Aizawl District-ah 17, Kolasib District-ah 9, Champhai District-ah 6,  Khawzawl District-ah 4 leh Siaha leh Lawngtlai District-ah hri kai mi pakhat ve ve hmuh an ni.

Nimin khan Mizoram-ah hri kai enkawl dam mi 152 an awm belh leh thung a, heti hian nimin tlai thlenga Mizoram-a hri kai hmuh tawh chu 2,24,261 niin an zinga 2,22,628 te chu enkawl dam an ni tawh a, hei hi hri kai hmuh atanga chhutin za zela 99.27 enkawl dam ang an ni a, hri kai enkawllai mi 949 la awmin hri kai zingah mi 684 an boral tawh bawk a ni.