Fai turin retheih emaw hausak kher emaw a ngai lo - Fai kan tlin e

Fai turin retheih emaw hausak kher emaw a ngai lo - Fai kan tlin e

- C. Ramengmawia

Kumdang a kan lo hman thin angin ‘Faina Hapta’ chu kan hmang leh mek a, amaherawhchu, COVID-19 hripui leng mek avangin kumdang a vantlang hnatlang kan neih luih luih ang chi kha a rem ta lova, chhungtinte kutah kan innghat thui hle, Faina hi thawklehkhata tih hluai hi tih loh ai chuan a that rualin kumtluana fai hi a hlu a, Changkanna chikhat a nih piah lamah Hriselna rahbi pawimawh tak a ni.

Khawtlang fai turin chhungkua kan pawimawh :

Kan hriat angin mihringte hi cheng hova, Veng leh khua ding kan ni a. Khawtlang a fai theih nan mimal chhungkaw tin ten mawh kan phur theuh a, keimahni chhungkua theuh faina kawngah inzirtirna tha kan neih phawt chuan kan tu leh fa, chhung ten kan khawtlang leh Veng ti baltu ah an tang dawn lova, hetianga kan inzirtir theuh chuan beih chiam ngai lovin kan khawtlang/ Veng chu a lo fai tawh mai dawn a ni. 

Hmanlai kan pi leh pute kha an Fai vak lova sawina a awm thin a, a dikna chen pawh a awm thei ang. Amaherawhchu, tunlai angin intih faina hmanrua leh tui te kha an harsa em em vek a, an hriatzauna in a la tlin loh vang te pawh kha a ni thei bawk. Amaherawchu, hetihlai reng hian vantlang kawngpui leh hmunhma ti bawlhhlawh lo tura inzirtirna an neih that avangin khawilo vahchhuahnaah an ti bal ngai lova, an sulhnute felfai takin an kalsan thin a, vantlang thil hi an zah em em thin a ni. Tin, tui dehna thli te vantlang tana hnawksakin an awm tir ngai lova, ‘vantlang anchhia phurh a tha ngai lo’ an lo ti thin bawk.

Tunlai khawvel changkang tawh tak, tu mai pawhin Smart phone kan hum tawhna hun-Faina leh thianghlimna in hriselna leh changkanna a keng tel tih kan hriat reng tawh hnua keimahni chhungkaw tui dehna thli vantlang tana hnawksaka kan la luantir dul dul te, kan Septic Tank Sock-pik khuavang rikham kawrhte a kan luan tir mai te leh rimchhe tak tak kan la chhuah fo mai te hi a a smart lova, kan phone chiah a smart min ti ang tih a hlauhawm hle.

Tin, a khapna hnuaia kan leng chungin Zu um leh hmanraw dang kan thehthang kawngah Dan kan bawhchhiat a thuah hnih thin hle. Mi tam zawkin zu um, plastic bottle leh disposable no leh thil dangte bawlhhlawh bawm-ah tha taka paih lovin, mi thenkhat chuan an vawm keh emaw zui a, kan khawsakna ah hnawksak takin kan kalsan mai thin. Heng polythene( Sarang) leh a bikin plastic bottle leh Dispo thleng leh no kan tih angte hi hun hmasa lamah a thehthang danah kan fimkhur loh avangin kan luite a bawlhhlawh mek a, kan hmun Lo ramte pawh a him loh phahin, leimin te pawh a awm phah ta fo a ni.

Hetiang hi kan dinhmun a nih avangin a tlawm vang leh leklam a awlsam tlukin, tun hnuah a thehthang kawngah fimkhur tawh ila. Department duhdan angin a hmun turah paih theuh ila, hman nawn theih chi ang te chu hman nawn nachang kan hriata kan inzirtir a hun tawh a. Tin, thil hmanraw tangkai leh thil cheimawina atana hmante pawh kan zir zui a tha hle.

Tin, heng plastic leh polythene -te hi hmang uar lo deuh tura chhung tinte kan inzirtir a hun tawh a. In chhungkhur bakah zirna school leh Sunday School thlenga naupang zawkte tun atanga kan inzirtir loh chuan hun engemaw ti hnuah lui leh kawrh-ah te luang lutin, kan lui dungte a ti bawlhlawh a. Mi dang tana harsatna siamtu kan ni thin.

Hapta chhunga Fai hluai pawh hi a tha ve hrim hrim :

Fai leh thianghlim hi a nuam a, hriselna leh changkanna a ni tih kan hre reng chung hian kan lo bal leh thin a. Kum khat chhungin October thla tir chawlhkar khat hi ‘Faina Hapta’ atan kan hman thin angin, he hun deuh chauha kan fai leh hluai thin pawh hi intihfai miah loh ai chuan a tha hrim hrim a ni.

Kan hriat angin Mizote hi kan fai ve tan ta hle a, keimahni taksa piah lamah kan thuamhnaw, kan In leh a vel thleng a vawnfai hi kan tih tur hmasa a ni a. Mi tam tak hi an hmel en atang ringawt chuan an In chhung leh a vel an vawn fai dan a hriat theih lohva, mahni inchei vul chuk, In leh lo bal tak si te hi awm theih a nih avangin hetiang mite hian mi nuih an ti za thin a. Chuvangin keimahni kan intih fai rualin, kan In leh a vel, kan khawtlang vawn fai kawngah mawh kan phur a ni.

Mizote hi a ram leh a hnam ang chuan kaihhruai nuam tak kan ni tih a hriat a. Sawrkar leh thuneitu sang zawkte min kaihhruai a, zirtirna an pek chuan khawtlang vawnfai leh tih thianghlim kawngah pawh hmuh leh lang thei khawpin kan fai nghal kuar zel a. He kan thu awih theihna hi naupang thanglaite thinlungah tuhin, khawtlang vawn fai leh tih thianghlim ang chite hi an nuna bet tlat tura tun atanga kan zirtir a pawi mawh a, chu chuan khawtlang leh ram nuam a siam ngei ang.

Kumtluanin kan fai thei :

Chet tawp hi a awlsam a, fai leh thianghlim hi a nuam thung a. Chuvangin a Hapta hun chhung chauhva fai hi a that rualin, fai reng a pawimawh zawk a ni. Hemi nei tur hian sawrkar thuneitute hian kawng hrang hrangah fai leh thianghlima inelna buatsaih chhoh zel nise, a tha emaw tha lo emaw lawmman te siamsak se, tichuan Faia in el hi a hranpaa

hmang kher lovin kan fai kumtluan theiin a rinawm.

Tin, faina chungchangah hian naupangte hi kan zirtir a pawimawh hle, thil eina kawr leh bawm te khawlaia paih mai mai te ching lo tur leh a hmun taka paih thin tura zirtir hi nu leh pa, rual u zawkte mawhphurhna a ni a. Fai hi an thisen-a an thanhnan theih nan an naupan lai atanga kan kaihhruaia, kan zirtir ngun a tul a ni. Eng pawh nise, fai hian thil ken tam tak a neih avangin kan fai hi a lawmman chu a ni.

Faina kawngah mitin mawh kan phur :

Faina chungchangah hian mitin-in mawh kan phurh avangin a ti faitu kan ni lo a nih pawhin a ti baltu ni lo thei vek ila. Tin, khawlai leh hmun dangah te pawh kan thil eina leh hmuamna te paih mai mai lovin, ipte-a ah that nachang hria ila. Dawrkaite leh chhungtin-in kan hnawm khawlna bawlhhlawh bawm tha tak nei theuhvin, a paihna hmun turah chauh paih thin ila. Tichuan hun reiloteah kan khawpui hi khaw fai leh nuamah kan siam theiin a rinawm.

Tin, fai leh thianghlim thuah hian sawrkar-in hlawh neia a chhawr te an awm tih avangin Department kan papek ngawt tur a ni lova, sawrkar chu mipuite siam, mipui ta a nih miau avangin kan thawhhona a that leh a zar kan zo tlang dawn a ni.

Faina leh thianghlimna nei turin rilru hrisel neih a pawimawh :

Faina leh thianghlimna kawngah tih leh tih loh tur, a tha leh a chhia, a paihna hmun leh a paihlohna hmun a tih dan tur ang zawng zawng hi chu naupang te thlengin kan hre vek a. Chuvangin keimahni mimal, chhungkaw kutah kan rilru put hmang a zirin kan tiin, kan ti lo thei.

Mi rilru hrisel nei lo chuan a ran Ui emaw chu a thenawmte kawtkai-ah a inthiar mai thin pawhin a en liam mai thin. Mahni In leh a vel ti faitu-in a bawlhhlawhte leh hnawmhnawkte a paihna hmun tur taka a paih loh chuan Bawlhhlawh awmna a sawn tihna mai a ni thin. Mi rilru hrisel chuan vantlang leh mimal bawlhhlawh thlengin tenna leh phun nawi mai lovin a thianfai a, a hmun takah a paih mai thin thung a ni.

Fai kan tlin e :

Thawk leh khata fai hluai hi a that rualin, kan nunpui theih nan kan theihna zawn theuhvah hma la ila, Fai tur hian retheih emaw hausak kher a ngai lova, kan rilru hi a pawimawh ber a nih avangin Fai han tih hian pawn lam, a lang lai chauh tih faina piah lamah he Faina Hapta avang ringawt pawh hian kan thinlung chhung nen intihfai tharna hun atan hman i tum ang u.