Zah lo taka vautute Vote lo ngam turin an ngen

Mizoram Pradesh Congress Committee chuan Tuirial bial-a Assembly bye-election neih turah mipuite leh sawrkar hnathawkte zah lo taka vautute chu vote lo ngam turin an ngen tih an sawi.

Nimin-a Aizawl Press Club-a thuthar thehdarhtute an kawmna ah MPCC hruaitute chuan Tuirial bial Bye-Election neih mekah Tuirial bial mipuite chu Chief Minister Zoramthanga'n vauin, Ruling Party an thlan loh chuan an inchhir tur thu a sawi thu leh hei mai hi ni lovin, Tuirial bial chhunga sawrkar hnathawk awm tam tak chu MNF candidate vote tura vau beh an ni tih an hriat thu an sawi a. “He thil hi Democracy kalphung leh India dan kalh a nih avangin Congress Party chuan pawmzam theihah kan ngai lo a, ngun takin kan chhui dawn a ni,” an ti a. Tuirial bial mipuite hian duhthlanna thiang tak hmangin anmahni bialtu tur MLA hi an thlang ngei tur a ni tih sawiin, mipuite leh sawrkar hnathawkte zah lo taka vautute hi vote lo ngam turin Tuirial bial mipuite an ngen tih an sawi a ni. MPCC hotute chuan an Party chu mi tha thlankhawm ni lovin mi tling lo te te awmkhawm an ni tih an sawi a, chuvangin tihsual palh pawh an ngah ang tih sawiin, ngaihdam dil chungin, insiamthat tumin nasa takin hma an la mek tih an sawi bawk.