Chanchin thar thenkhat :

Mizoram tan RT-PCR Van

Mizoram-ah kum khat chhung Mobile RT-PCR Van hmang turin niminpiah khan inremna thuthlung ziahfel a ni. He inremna thuthlungah hian sawrkar laipui aiawhin IBSD Director Professor PK Mukherjee leh Mizoram sawrkar aiawhin COVID-19 leh IDSP State Nodal Officer, Dr. Pachuau Lalmalsawma ten hming an ziak a. Inremna thuthlung an ziahfel hnuah nizan hmasa khan Manipur Film Development Corporation Complex Auditorium, Imphal-ah Union Minister of State, Ministry of Science & Technology Dr. Jitendra Singh hmaah MOU hi inhlan a ni. Dr Pachuau Lalmalsawma chuan hun rei tak ata tawh kan Chief Minister leh Health Minister ten an lo buaipui Mobile RT-PCR Van kan hmang thei tur chu lawmawm a tih thu sawiin, Hmarchhak State pali in an  beisei laiin Mizoram chauh pek a nih thu a sawi bawk.

He RT-PCR Test-na motor hi buatsaih mek niin hun reilote ah Mizoram a lo thlen beisei a ni a. He inremna hi kum khat chhung atan niin Sawrkar laipui-a Department of Biotechnology in a thawktu leh tul dangte a rawn tum dawn a ni.


All Mask Campaign hawng

COVID-19 hrileng laka him nan leh hri inkaichhawng zel tur chhut chah a nih theih nana sawrkar hmalakna, mitinte hmaituamna hmang uar tura inzirtirna 'All Mask Campaign' chu ngawrh lehzuala Khawzawl District-a hman turin nimin khan Khawzawl-ah District Bawrhsap CC. Lal-chhuangkima chuan a hawng a. He hunah hian Bawrhsap chuan All Mask Campaign hman chhungin mitin te hmaituamna tha taka hmang tur leh inchhung-khura kum upa leh natna benvawn chenpui neite phei chu inchhungah pawh mask vuah ngai pawimawha a tul tawpah lo chuan phelh hauh lo turin a chah bawk.  All Mask Campaign neih chhung hian mipuite zirtirna kawng hrang hranga kalpui tura ruahman niin Media hrang hrangte leh tualchhung chanchinbu-ah te pawh mipuite zirtirna hi tihchhuah a ni dawn a ni.


EVM hman tur thliarfel

Tun thla ni 30-a Tuirial Assembly bial bye-election neih huna Vote thlakna atana hman tur EVM te chu nimin khan Kolasib DC office- ah Computer hmangin a hmanna hmun tur Polling Station ruahman fel a ni a, he hun hi Election General Observer Mohammed Ali Shihab chuan a telpui a ni. Tuirial bial-a bye-election neih tur atan EVM hman tur hi ECI hriatpuina in 41 ruahman a ni a, Tuirial bial-ah hian Polling Station 27 awmin heng te hi thlan fel a nih rualin, EVM dang 14 te chu EVM chhiat thulha hman nghal theih tura dah a ni ang. Nimin-a EVM thliarna ah hian Political party aiawhte pawh an tel a ni.


MNF in Campaign nei mek

MNF Party chuan Tuirial bial-a Assembly bye-election neih tur atan ngawrh takin campaign an nei mek a. Nimin khan an party Vice President Lalthlengliana chuan he Bial hi tlawhin khaw hrang hranga Campaign Office-ah thu sawiin, Tuirial bial chu sawrkar tan hmalakna chakawm taka siam turin bial mipuite a chah a. “Kan candidate in vote tlin ngei a ngai. Kan sawrkar vanglai takin Serchhip-ah kan chak tawh lova, he bial-ah hi chuan kan candidate in tihtlin ngei a ngai. Hei hian kum 2023 General Election lo awm tur a hawlhtlang vek a ni,” a ti bawk. Nimin vek khan MNF Candidate K. Laldawngliana hovin Khamrang-ah an Party zawm thar mi 21 te lawmluhna hun hman a ni bawk.


AICC GS in Mizoram tlawh

All India Congress Committee (AICC) General Secretary i/c Mizoram leh Union Minister hlui, Bhakta Charan Das Mizoram rawn tlawhin nimin khan a pualin Aizawl Congress Bhavan-ah hun hman a ni a. He hunah hian Bhakta Charan Das chuan Congress Party chu India ram mipui zawng zawng huap Party awm-chhun nia sawiin, “BJP-in nasa taka India ram an sawpchhiat tawh hi siamtha leh turin Congress Party hi Mizoram leh India ram pumah a thochhuak leh ngei dawn a ni,” a ti. He hunah hian MPCC President Lal Thanhawla pawhin Mizoram Congress chu Central Congress-ah an innghat ngai lo tih sawiin, an la dingchhuak leh zel bawk ang tih a sawi bawk.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man