MPCC in Political Party leh CM an ngen

Mizoram Pradesh Congress Committee (MPCC) chuan Kohhran in a khak ngai khawp leh Pathian rawngbawltute zahawmna ti hminghliau zawnga che tawh lo turin Political Party leh Chief Minister Zoramthanga an ngen tih an sawi.

Inrinni-a thuchhuah an siamah MPCC Media Department chuan Zirtawpni (Oct. 22, 2012) khan Chief Minister Zoramthanga chuan MNF kum 60 tlin lawmna inkhawm Vanapa Hall-ah thu sawiin, Pastor-te chu Zu zawrh sawimawi thin nia a sawi thu leh hetianga dawt hmanga intih hminghliau tum hi Pathian Kohhran rawngbawltu Pastor-te leh Kohhran diriamna leh zahlohna nasa takah an ngai tih an sawi a.

Ram leh hnam thatna leh hmasawnna tak tak duh vang ni lo, lalna leh thuneihna chan tum ve avang ringawta Kohhran zahawmna tihminghliau zawnga Political party thenkhatin Pathian Kohhran ho hmanruaa an hmang duh chu pawi an ti takzet tih sawiin, “An beisei ang lalna leh thuneihna chan loh avanga chhuanlam atan Kohhran rawngbawltu Pastor-te zu zawrh sawimawi thin anga puh duh khawp Kristian State-in Chief Minister kan nei hi Congress Party chuan vanduai thlak a ti takmeuh bawk,” an ti a. MPF meuhin thuthar thehdarhtute hmaah thuneihna beisei vang ringawta Kohhran zahawmna leh ropuina tihminghliau zawnga che an awm thu an sawi a ngai ta mai pawh a pawiin an zahawm takzet tih an sawi a ni.