Serchhip SHQ YMA in raltlan tanpuina pe

Serchhip Sub-Hqrs. YMA chuan Myanmar atanga raltlante tanpuina leh chhawmdawlna tur an dawnkhawm hrang hrangte chu nimin khan Branch 9-ah an semchhuak.


Serchhip Sub-Hqrs. YMA hian Myanmar atanga Mizoram-a rawn raltlan te chhawmdawlna atan hian sum leh pai bakah eitur leh mamawh hrang hrang thahnem tak dawngkhawmin heng te hi nimin khan Branch 9-ah semchhuah a ni a. Heng tanpuina sem turte hi nimin zing khan Serchhip-a Sub-Hqrs. YMA Office atangin President Kawlthuama chuan thlahliamin, hetianga Zohnahthlak mangang-a rawn raltlan te chhawmdawlna tura mi inphal ten thilpek chi hrang hrang an pe chu lawmawm a tih thu a sawi a ni.

Tun tumah hian Serchhip Sub-Hqrs. YMA huamchhunga Branch 5-ah tanpuina hi sem niin N. Vanlaiphai Venglai leh N. Vanlaiphai Damdawi Veng leh Leng Branch YMA te hnenah Rs. 10,000/- theuh hlanin Sailulak leh Lungkawlh Branch te hnenah Rs. 5000/- ve ve hlan a ni a. Serchhip Sub-Hqrs. YMA area pawnlam-a Branch 4- Cherhlun, New Ngharchhip, Ngharchhip leh Thingsai Branch YMA te hnenah Rs. 5000/- theuh hlanin heng Branch hrang hrang te hnenah hian pawisafai bakah buhfai leh eitur , Thawmhnaw leh Mutbu te pawh an mamawh dan a zirin pek nghal a ni bawk.

Serchhip Sub-Hqrs. YMA hian raltlan te tanpuina atan hian Central YMA-ah Rs. 4,63,410/- an lo chhunluh tawh bakah an huamchhunga raltlan te hnenah tanpuina an lo hlan tawh bawk a, nimin-a tanpuina hlana kal te hi Serchhip Sub-Hqrs. YMA atangin Fin. Secretary Zolianmawia chuan a ho a ni.

Comments

Popular News (Last 30 Days)

Serchhip DCSO sawn a ni