Sawrkar hnathawkte leh keimahni intuituahna tur atana sawrkar hi awm a ni lo - Chief Secretary

Mizoram Chief Secretary leh Chief Vigilance Officer ni bawk Lalnunmawia Chuaungo chuan, “Sawrkar hnathawkte leh keimahni intuituahna tur atana sawrkar hi awm a ni lo,” a ti.

‘Vigilance Awareness Week’ denchhenin MINECO-a thawk Sawrkar hnathawk te chuan nimin khan a huhoin hlemhletna do a, eirukna lakah fihlim turin thutiam an chamrual a, hemi hmaa inkhawm tawi neih ah Chief Secretary chuan kumin-a Vigilance Awareness Week thupui ‘Independent India @ 75 : Self Reliance with Integrity’ tih chu sawi zau in, hlemhletna leh eirukna lakah kan fihlim theihlohna chhan chu kawng hrang hranga kan intodelh loh avangte, mamawh kan nei nghah avangte, duhawmna rilru kan neih avangte leh retheihna avanga a ni tlangpui tih a sawi a. Heng te laka fihlim mai chu tawk lovin theihtawp chhuaha kan do tlan a ngai tiin Sawrkar hnathawkte a fuih a ni.

Sawrkar chu mipui tan leh mipuiten hmasawnna an nei theihna atana awm a ni tih pawh sawiin Chief Secretary chuan, “Sawrkar hnathawkte leh keimahni intuituahna tur atana sawrkar hi awm a ni lova. Heng hmasawnna ngaihtuah tur atana mipui sum-a rawih sulsutu mai kan ni tih hi Sawrkar hnathawk ten kan vawn leh kan hriatnawm fo a tha,” a ti a. Ram hnuk khawih hlemletna te chu vaihma hmasak a tul tih sawiin, eirukna tenau te chu a zungpui phawrh chuan a kiam duak thei a ni, a ti a. He huna tel Secretariat-a thawk Sawrkar hnathawkte chu ram leh sawrkar hnuk khawihtu an nih angin kawng tin rengah miin rinna an nghah ngamna tur leh rinawmna ‘integrity’ sang tak nei reng tur an a ni tiin nitin an hnathawhna ah hengte hi rilru a vawng turin a chah bawk.

Vigilance Awareness Week hi India Deputy Prime Minister leh Home Minister hmasa ber Sardar Vallabhbhai Patel a piancham, October ni 31 thlen hma kar, October thla chawlhkar tawp berah hman thin a ni a, nimin khan Aizawl bakah District khawpui hrang hrangah te pawh he ni pual hian sawrkar hnathawk ten thutiam hi an chhamrual a ni.

Sawrkar thuchhuah in a tarlan danin Eirukna leh hlemhletna ven nan sawrkar laipui chuan Prevention of Corruption Act, 1988 a siam a, Sawrkar hnathawk bikah chuan eirukna laka an fihlim theih nan CCS (Conduct) Rules-in a phuar mek bawk a. Anti-Corruption Bureau (ACB) chu Mizoram sawrkarin dinin, eirukna leh a kaihhnawih chhui nan a lo hmang tawh thin a, ACB hian eirukna leh a kaihhnawih tam tak hailangin Dan angin mi engemaw zat hrem an ni tawh bawk a ni. Mipui chanvo dikna humhalhtu tur atan Mizoram Lokayukta chu The Mizoram Lokayukta Act, 2014 hnuaiah a din tawh bawk a ni.