Agriculture Department in Vaimim tharchhuah lei sak

Serchhip District-a kuthnathawktute Vaimim tharchhuah te chu tunlai hian a fang mal-a nuaithlak sa in Agriculture Department chuan FOCUS hnuaiah kg-ah Rs. 20 in an lei sak mek.

FOCUS Serchhip District-a District Project Manager K. Laltlanmawia chuan Serchhip District chhung khaw hrang hranga loneitute hnen atangin Vaimim hi quintal 700 chuang an lei khawm sak tawh thu sawiin, heng Vaimim nuaithlak te hi Ar leh Vawk chaw atan Khawl-ah her sawm phawt anih thu sawiin,hei hi a duh apiang tan man tlawm zawka hralhchhuah leh mek a ni tih a sawi a ni.

FOCUS DPM chuan Vaimim atanga Ranchaw chi hrang hrang siamna tur atana bawlhlo ngai thenkhatte chah mek a ni tih sawiin, a nihna tur ang taka Vaimim hersawm chu Ranchaw atana sawngbawl anih hunah chuan phailam atanga Ar leh Vawk chaw siamsa lo kal chho thinte aiin a that zawk dawn thu leh mipuite pawhin man tlawm zawk a an lei theih dawn thu a sawi bawk. FOCUS hnuaiah kumin hian Serchhip District-a khaw 20-ah chhungkaw 550 in Vaimim an chingin a chi quintal 33 sem a ni a, Tin 800 hmun velah Vaimim hi chin a ni.