DCPU hnuaia hmalakna hrang hrang thlirho

Nimin khan Lawngtlai-a District Level Child Protection Committee chu thukhawmin District Child Protection Unit (DCPU) hmalakna leh hmachhawp hrang hrang an sawiho.

Lawngtlai DC Conference Hall a thutkhawm ah hian kum 2019 April thla atanga kumin (2021) October thla thlengin Lawngtlai District chhungah naupang chunga mipat hmeichhiatna lam hawia dan bawhchhiatna (POCSO Case) 30 a awm thu tarlan niin, hei hi tun hma aia a san zawk avangin tan lak lehzual a tul thu tarlan a ni a. Zau zawk leh mipui huam kim zawkin inzirtirna lam kalpui chhunzawm zel nise an ti a ni.

DCPU hnuaia Committee hrang hrang zingah naupang enkawlna leh himna lam ngaihtuahtu Child Welfare Committee (CWC) chuan kum 2012 atanga October, 2021 thlengin case 460 nei tawhin, case 450 chinfel tawh a ni a; Dan bawhchhiatnaa inhnamhnawih naupangte chung thu ngaihtuahtu Juvenile Justice Board (JJB) chuan chuan kum 2012 atanga October, 2021 thlengin case 135 nei tawhin, case 132 an chingfel tawh thung a. Naupangte him nana hma laknaah, Lawngtlai District chhunga Police Station 5 leh Police Outpost 2-ah te Special Juvenile Police Unit din vek tawh a ni bawk.

Lawngtlai DCPU enkawlna hnuaiah hian naupang enkawltu neilo te enkawlna (Children Home) pakhat, Lairam Motherless Home (LMH) awmin Dan bawhchhiatnaa inhnamhnawih naupangte enkawlna (Observation Home) pakhat, Lawngtlai Observation Home (LOH) leh Fa lak lam buaipuitu (Adoption Centre) pakhat, Lairam Child Adoption Centre (LCAC) a awm a. LMH-ah hian naupang 21 awmin, LOH-ah naupang 2 leh LCAC-ah naupang 1 an awm mek a. Tun thlengin chhungkhat te'n naupang fa atana an lak (relative adoption) hi 5 tihfel tawh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar