Latest News

Consumer Protection Act, 2019 tlangzarh

Supply Minister K. Lalrinliana chuan nimin khan a Pisa-ah ‘Consumer Protection Act, 2019’ Mizo tawng-a lehlin chu a tlangzarh.

Hemi puala inkhawm tawi neih ah Supply Minister chuan Mizoram Consumer Union leh FCS&CA Department te thawhhona avanga Consumer Protection Act, 2019 Mizo tawng ngeia chhiar theih tura dah a ni ta chu lawmawm a tih thu sawiin, mipui mimir, Consumer te dikna chanvo humhalhna kawngah nasa takin a tangkai thei dawn tih a sawi a. Thil leitu mipuiten Dan tlawhchhana huaisen taka an dikna chanvo an humhalh theihna turin he CPA, 2019 Mizo tawng-a a bu siam chhuah tak hi mipui (consumer)-ten an hriatchian a tul a, an chhiar tam pawh a tul a ni, a ti bawk.

‘Consumer Protection Act, 2019’ hi Mizoram Consumer Union President Prof. Chawngsailova chuan Mizo tawng-a letling in a bu hian siam a ni a. Consumer Act, 1986 chu kum 2019-ah thiah niin he Dan thar hian a thlak ta hlawk a. Consumer te tawng chhan ber, Consumer Disputes Redressal Forum, District Forum chu thuneihna sang zawk neiin he dan thar hian Consumer Disputes Redressal Commission, District Commission tiin a thlak a. Cheng nuai 20 atangin cheng vbc. khat thleng thubuai khawih theihna thuneihna a nei tawh a. Consumer Commission in order a tihchuah zawm lo chu thla 6 thleng lung In tan leh cheng nuai 20 thleng chawi tir theih niin Court kal kher ngai lova thu-buai sawi rem theihna tur Mediation Cell a siam bawk a ni.

Comments

Popular News (Last 30 Days)