COVID-19 Sample Test kaihhruaina tichhuak

Mizoram sawrkar chuan COVID-19 Sample Test chungchang ah inkaihhruaina thar a tichhuak a, thih hnua Sample Test chu tih loh tur a nih thu tarlan a ni.

Health & Family Welfare Department in COVID-19 Sample Test chungchanga kaihhruaina a tihchhuah thar ah hian Mizoram a lo lutte chu Entry Point-a Screening SOP ding lai angin test tur an ni a. COVID-19 natna lang chhuak (Khawsik, Hrawk na/thip, Khuh, Rhinitis (hnarza/ping/hnaptui), Kawthalo, Rim hriatna kiam/hloh, Thawk lama harsatna nei) tawh phawt chu, vaccine lo la tawh leh hri vei dam leh pawh nise RAgT in test thuai tur a ni ang.

Primary High Risk Contact [COVID-19 hri kai nena invenna (Mask/Kutkawr etc) vuah lova feet 6 inhnaiha minute 15 emaw, a aia rei emaw lo awmho te] chu chutianga an lo awmho (contact) atanga ni 5-10 chhungin RT-PCR/TrueNat-a test tur a ni a, Covid vaccine Full dose la tawh pawh test tur niin test neih hma ni 5-10 chhung hian quarantine kher lovin uluk takin CAB an zawm a tawk a, Thla thum kalta chhunga Covid-19 vei dam leh tawhte chu symptom an nei thar leh a nih loh chuan Covid-19 veite lo awm hnaih pawh ni se test kher an ngai lova, chu’ng mite chu Covid hri vei awmna chhungkua ‘Home Isolation’-a awm an nih erawh chuan Contact Tracing leh Home Isolation SOP te an zawm ang. Heng bakah hian anmahni enkawltu Doctor/Hospital thuneitu te’n Covid-19 test ti tura an hrilh te pawh Test tur a ni bawk ang.

RAgT positive te chian lehzual tuma Test nawn chu a tullo tih tarlan niin COVID-19 symptom nei chunga RAgT test result negative si chu rang takin RT-PCR/TrueNat hmanga test zui vat zel tur a ni a. Sample Test te hi uluk taka chhinchhiah tur niin, “Mi tumah an thih hnuin Covid-19 test tih loh tur a ni,” tih tarlan a ni bawk.