Hri kai inringhlel te Sample Test vat turin ti

State Referral Hospital, Falkawn-Zoram Medical College-a COVID Task Force hotute leh ZMC-a damlo enkawltute chuan hripui vanga nunna kan chan loh nan inringhlelte leh symptom neite chuan a rang thei ang bera sample an test vat vat a pawimawh thu an sawi.

Nimin khan ZMC-a COVID Task Force Nodal Officer Dr. PC. Lalramenga chuan ZMC ICU-a damlo an enkawlte dinhmun an zirchianna ah sample test hma a, hri kai tih inhriatchhuah vat a inenkawl nghal hi a pawimawh hle tih sawiin, hei hian an rilru a luah hle tih a sawi a, positive zat atanga chhuta nunna chan kan tlem chu a lawmawm an tih rualin ICU-a serious taka lut an tlem phah si lova, an zingah nunna chan an pung zel si a nih bawk chuan thil lawmawm a ni lo a ni, a ti a. “Nunna chhan hi kan tum ber a ni a, a tuartute tan a nat bakah keini damlo enkawltute pawhin na kan tiin hrehawm kan ti ngawih ngawih a ni,” tiin Inringhlel leh symptom neite chu rei rial lova anmahni Veng/khua Task Force te emaw, Medical mi hnaivaite hriattir a, sample test-na hnai ber pan vat turin a chah a ni.

Dr. Lalnunmawii Sailo, Associate Professor, Anaesthesilogy & ICU in-charge, ZMC pawhin ZMC ICU-a damlo serious tak tak admit te zingah hritlang satliah mai mai ti a palzam tum an tam tih sawiin, a tirah engah vak an ngaih loh avang leh dam leh mai tura an in ngaih avangin an ngaihthah a, a lo rei deuh a, a serious tak hnuah sample an han test a, an positive tih an inhriat meuh chuan ICU a luh ngai khawpin a lo tlai hman tawh thin a ni, a ti a. COVID-19 hri kaite chu hri an kai tirh atanga serious taka awm nghal an ni ngai lova, thalai hrisel te leh mi chakvak te chuan hritlang pangngai angin na vak lovin an dampui a ni thei a, hri kai zawng zawngah a ni thei lova, a bik takin thalaiten In-ah hri hawnin an chhungte an kai a, anmahni chu an dam nghal pawh a ni thei a, an kaichhawn an chhungte zinga natna benvawn nei leh tar chak lo te, hriselna pan te erawh chuan na takin an tuar thei a ni, tiin mitinin kan chenpuite leh kan bulhnaia awm te kan ngaih pawimawha kan fimkhur a tul thu a sawi bawk.

Vaccine lak pawimawhzia pawh sawiin Dr. Lalnunmawii chuan ZMC-a COVID-19 vanga nunna chan zinga 16% chu vaccine Full Dose la an ni a, 24% chu Vaccine First Sose la hman niin, a bak zawng 60% chu Vaccine la lo an ni, a ti a. Vaccine la tawh zinga nunna chante hi natna khirh tak chi hnih/thum lai neite leh kum 80 chunglam te an nih thu a sawi bawk. ZMC-a COVID-19 positive an enkawl sa ICU a an admit aiin pawn lam atanga refer ICU a dah luh nghal ngai khawpa serious hi a let tam tak an ni tih sawi bawkin refer hma leh tlai hian thui takin awmzia a nei a, chumi tur chuan in test vat a, hri kai inhriat veleha inenkawl hian nasa takin min veng dawn a ni, a ti.

Comments

Popular News (Last 30 Days)

Serchhip DCSO sawn a ni