Raltlan te Mizoram-ah zirna chhunzawm phalsak

Mizoram Board of School Education (MB-SE) chuan Myanmar ram buaina avanga Mizoram-a raltlan zinga zirlai ten Mizoram-ah zirna an chhunzawm phalsak a nih thu thuchhuah siamin a tarlang.

MBSE thuchhuah chuan Myanmar ram buaina avanga Mizoram-a raltlan zingah High School leh Higher Secondary School-ah zirlai engemaw zat an awm thu tarlangin, Mizoram sawrkar remruatna angin heng zirlai raltlante hi Mizoram-ah zirna chhunzawm phalsak an nih thu leh MBSE dan dinglai angin zirlal zawng zawngin Registration tih vek tur a ni tih a tarlang a, raltlan zirlai nei School-te chu a rang lama hma la tura hriattir an ni.

Tuna an raltlanna khua/venga Local Council/Village Council/YMA/YLA/MTP Chairman emaw President emaw hnen atangin raltlan an ni ngei tih hriatpuina lehkha thil telin Registration form-te hi MBSE Office, Aizawl-ah emaw, MBSE Regional Office, Lunglei-ah emaw Head of Institution kaltlangin thehluh tur a ni a. An zirna tilang thei document awm ang angte thil tel vek tur niin chutiang neilo te dilna chu a bika ngaihtuah a ni ang.

Registration dilna form hi November ni 10, 2021 thleng thehluh theih niin hemi hnuah chuan pawm a ni tawh dawn lova, Registration Fee hi Higher Secondary-ah Rs. 200/- leh High School-ah Rs. 100/- a ni anga, dilna form hi MBSE official website www.mbse.edu.in-ah download theih a ni bawk.