Mizoram-a COVID-19 hri leng mek dinhmun thlirho

Nimin khan Health Minister Dr. R. Lalthangliana hovin Mizoram a COVID-19 dinhmun sawiho a ni a, Mizoram-a COVID-19 hri kai thar an tlem tial tial tan ta nia lang chu hmasawnna lawmawm tak a nih thu tarlan a ni.

SAD Conference Hall-a he thutkhawm ah hian IDSP Nodal Officer Dr. Pachuau Lalmalsawma chuan Mobile RT-PCR Van sawrkar laipui attnga kan hawh dan tura hmalak a nih dan sawiin, nikum kum laihawl atanga hmalak tawh, tun huna a hlawhtlinna kan hmu ta hi a lawmawm a ni, a ti a. Mobile RT-PCR Van hi November thla laihawl velah Mizoram sawrkar kuta hlan hman beisei a nih thu sawiin, kum khat kan hawh hnuah min pe chhunzawm nghal dawn a ni, a ti bawk.

He thutkhawm ah hian Mizoram-a COVID-19 hri kai thar an tlem tial tial tan ta nia lang chu hmasawnna lawmawm tak a nih thu tarlan niin hetihrual hian inthlahdah mai a la hun lo tih sawi a ni a, mitinte tan tun hun hi fimkhur zual sauh sauh a tul rih lai a nih vangin theihtawp chhuaha mahni hmuna sawrkar SOP leh COVID Appropriate Behaviour zawm a ngaih thu sawi a ni bawk.

Mask vuah tura inzirtirna beihpui thlakna, ‘All Mask Campaign’ tun thla chhunga hman chhunzawm mek chungchang pawh sawiho niin hetih kawnga mawh la tura ruat ten an hmalakna leh ruahmanna te an sawi a, hri kai thar kan tlem hret hret laia nunna chan an la pung zel chu vei awm a nih thu leh hetih kawnga nasa lehzuala tan lak dan turte sawiho a ni.

ZMC hotute tarlan danin tunah hian ZMC-ah ICU khum 44 an nei tawh a, reilteah ICU khum 5 dang peihfel inbeisei niin nimin chhun dar 12:00 khan ZMC COVID Ward-ah damlo 221 enkawl mek niin, anmahni awmpuitu COVID-19 positive ve tho mi 83 an awm bawk a, ICU-ah mi 36 enkawl an ni bawk. ZMC-a COVID-19 positive enkawl mek zinga dyalisis tih ngai mi 4 leh raipuar nau zai chhuah sak tur mi 6 an awm a ni. August thla khan ZMC a COVID-19 hri kai enkawl zingah nunna chan mi 59 awmin, September thla-ah mi 63 an awm a, October ni 20 thleng khan nunna chan mi 59 an awm bawk. October thlaa nunna chan zinga mi 42 (71%) hi vaccine full dose la niin kum upa lam leh natna khirh tak nei sa an ni a, nunna chan zinga 45% hian vaccine an la lo a ni.

India ramah mipui vbc. 100 in vaccine an la tawh a, Mizoram-ah chuan dose 11,89,163 pekchhuah ni tawhin, 1st dose la hi 89.4% leh Full dose la hi 71.7% an ni a. Tar chak lo, damlo leh chhan hrang hrang vanga vaccine pekna hmun pan theilote chu an In-ah kal chilhin vaccine pek an ni a, First dose mi 572 hnenah pek tawh niin, full dose la mi 198 an awm tawh a, ID nei lo vaccine pek zat hi first dose mi 6199 leh full dose mi 503 an ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man