Skywalk siamna tur sum chhui turin tifel tep

MNF Adviser leh Tourism Department changtu Minister ni bawk Robert Romawia Royte chuan Sakawrhmuituai Tlang-a Skywalk siam tur chu sum tih chingpen avanga a khawtlai thu sawiin, a chhui tur an tifel tep tih a sawi.

Tuirial bial bye-election neih tura a campaign-na ah Robert Romawia Royte chuan Lungdai ram chhung Sakawrhmuituai Tlang-a Skywalk project chu Chaltlang leh Durtlang inkara Ropeway siam turah hnathawh hmaa cheng nuai 1200 chuang kum 2018 hmalama released tawh ni si, a taka sum hman mumal a awm loh avangin Ministry-in sum a rawn release duh tawh lo tih a sawi a, Sakawrtuichhun Skywalk atan pawh cheng nuai 245 lai hnathawh hmuh tur awm mang si lovin kum 2018 hmalamah released a lo ni tih a sawi bawk.

Robert Romawia Royte chuan heng Project 2 Contractors hi hna a thawh loh avangin a sum lak tawh kir turin vawi duailo Department-in a hrilh tawh chungin Mizoram pawh a rawn zin duh tawh l niin a sawi a, “Dan angin hma kan la zel a, cheng nuai sang chuang chingpen nia a lan avangin Lokayukta emaw, CBI emaw kuta pek mai kan ngaihtuah mek ta a ni,” a ti a. Ropeway chungchang hi dan kengkawhtute kuta dahfel a nih chuan Sakawrhmuituai tlang-a Tourism Project pawh hi tha taka kalpui zel tum a nih thu a sawi bawk.