Vawk khuahkhirhna chhuah

Serchhip District-ah African Swine Fever (ASF) avanga Vawk thi ala awm belh mek laiin Serchhip District Magistrate Kumar Abhishek IAS chuan Section 144 of Cr.PC 1973-in thu-neihna a pek angin ram dang (foreign countries) leh State thenawm atangin Vawk, Vawksa leh Vawksa atanga thil siam reng reng lakluh khap a nih thu thuchhuah siamin a tarlang a. Hei bakah hian Mizoram chhung District dang atanga Vawk lakluh leh thawnchhuah khap tlat niin Serchhip District chhunga khawdang atanga Vawk lalut tur ten VC Hriatpuina lehkha leh Veterinary Health Certificate, an mahni bialtu Veterinary Technical Staff hnen atangin an nei ngei tur a ni tih a tarlang a. Vawk talhtuten Vawk hrisel tha chauh an talh thin tur a nih thu leh Vawk damlo hralh loh tur a nih thu te a tarlang bawk. He thupek hi Oct. 20, 2021 atanga thla hnih (2) chhung huam tur a ni ang.