Tuirial Bial bye-election neih turah Campaign theih hun nimin tlai khan a tawp

Tunkar Inrinni-a Tuirial bial Assembly bye-election neih tur atana Campaign theih hun chu nimin tlai dar 6:00 khan a tawp ta a, Party hrang hrangte chuan hun tawp thleng hian Campaign hi an kalpui a ni.

MNF Party chuan he inthlanna neih tura Campaign hmar bawkna atan nimin khan Bukpui Bazar leh Lungdai Bazar-ah Street Cornet Meeting neiin hun an hmang a, he hun hi MNF President Zoramthanga chuan hmanpuiin tun tum Tuirial bial MLA thlan tur chu kum nga atan ni lovin tun term kal mek, kum hnih la awm tur atan chauh a nih thu a sawi a. MLA atan sawrkara mamawh thlen inthlahrung lo tur thlang thiam turin Tuirial bial mipuite a sawm a. Kum thar-ah chuan SEDP pawh engemaw chen kalpui tum a nih thu a sawi bawk.

Congress Party chuan Kawnpui, Lungdai, Thingdawl, Bualpui, Hortoki leh Khamrang-ah te nimin khan Campaign kharna hun hmangin he hun hi an Party hruaitu thahnem takin an hmanpui a, he hunah hian an Candidate Chalrosanga Ralte (Mavala) chuan Pathian zarah thlantlin a nih chuan amah a beiseina nghattu Tuirial bial mipuite a tibeidawng lo ang tih sawiin, “In tan ka theihna zawng zawng ka pe dawn a ni tih hi min hriat nawn sak leh rawh,” a ti bawk.

ZPM Party pawhin Campaign kharna hun hi nimin chawhnu khan Kawnpui-a Mini Truck Stand-ah an buatsaih a, he hunah hian an Party hruaitu hrang hrang ten thu sawiin ZPM Leader Lalduhoma chuan ram siamthatna turin kalphung thar, mipui sawrkar din chu an thupui leh hla pui a ni reng tih a sawi a, “Chumi kalpui tura kawng kan bo loh nan Road Map kan nei vek tawh a ni,” tiin Kalphung thar mipui sawrkar din huna tih tur pawimawh point 24 a sawi bawk.

BJP President Vanlalhmuaka pawhin he inthlanna neih tura Campaign theih hun tawp ni hian Bial tlawhchhuahna hun hmangin Tuirial Bial inthlan hi an Darthlalang pawimawh tak a ni tih a sawi a, “Party dang chuan mipui kohkhawm nan Sum an sem ni ten an sawi a, keini erawh chuan Public Meeting nei a sum sem tur erawh kan nei lo thung a ni,” tiin “Sum sem hi a pawi na chhan chu, heng sum an sen zawng zawng hi tuna Candidate te hian lo tling ta se an sum sen hmuhletna tur kha an zawn angai leh ngei dawn a ni tih hi kan hriat angai,” a ti bawk.