Tuirial Bial-ah ngawrh takin Campaign mek zel

Tun thla ni 30-a Tuirial Bial Assembly bye-election neih tur atan Political Party te leh an Candidate te chuan ngawrh takin campaign an nei mek.

He inthlanna a MNF Candidate K. Laldawngliana chuan nizan hmasa khan Kawnpui Chhim Veng-ah mithar 53 a lawmlut a, he hunah hian MNF Candidate chuan tun tum bye election-a thlantlin a lo nih hlauh chuan, bial mipuiten an thlantlin chhan ang ngeia hnathawk turin a theihtawp a chhuah dawn tih a sawi a, “Thil sawi mai mai chi ka ni lo a, ka sawi tawh chu tihhlawhtlin ngei ka tum thin a ni,” a ti. Nimin khan MNF Adviser Robert Romawia Royte chuan Rasdali khuaah Voter 59 MNF-ah a lawmlut bawk a ni.

Congress Party pawhin nimin khan Kawnpui VC-III Complex Convoy Ground-ah mi thar lawmluhna hun hmangin an President Lal Thanhawla'n mi thar 75 a lawmlut a. He hunah hian an Candidate Chalrosanga Ralte chuan Sum leh pai, nihna thlakhlelh vangin politics a khel lo tih sawiin, “Tuirial bial atang hian Mizoram politics thar, Kohhran leh mipuite beisei mek hi a taka lanchhuahtir hi ka tum ber a ni. Ram leh hnam tana ka thiltumte tha taka hlenchhuah hi hlawh tam tak aia ka ngaihhlut a ni a. MLA nih tum luat vanga nasa taka intiamkam a, mahni thutiam bawhchhia a, politics dik lo hmanga mipuite rilru natna leh beidawnna thlen hi ka thil hlauh ber a ni,” a ti bawk.

BJP pawhin niminpiah khan Kawnpui Chhim Veng-a Congress Party Senior Adviser Lalkailiana chu an Party-ah an lawmlut tih an sawi a, he hunah hian an President Vanlalhmuaka chuan Mizoram-ah chuan Politics hi kan hre letling hle nia sawiin, “Kan Politician te hian dawt a mipui bumna hmun emaw kan tih tlat avang hian Mizoram chuan hmasawnna (Development) kawng a zawh thei lo a ni,” a ti a. “Mizoram mipui aia thuawih leh fel leh kaihhruai nuam hi ram dangah hian an awm kher lo vang. Kan Politician te hi kan ring ve mai thin a, anni lah in tlin nan leh mahni inhai vur nan chiah Politics an lo khel bawk si a, hetiang dinhmun ah hian kan din phah ta a ni,” a ti bawk.

Hetihlai hian ZPM Party pawhin khaw hrang hrangah Campaign an nei chho mek a, tunah hian an Candidate Laltlanmawia bakah an Party President te chuan khaw hrang hrang an fang mek a ni. Hei bakah hian ZPM Thalaite chuan niminpiah khan Bualpui khua tlawhin, an Candidate Laltlanmawia hma lo lak tawhna te an en a, Laltlanmawia chuan, thlantlin a nih chuan Thingdawl khawtlâng mipuite tân Chem Lui panna kawng a laih tlang sak tur thu a sawi a, Chem Lui panna kawng hi laih tlang a nih chuan kuthnathawk chhungkaw tam tak tâna chhenfakawm tak tur a ni dawn tih ZPM Party chuan an sawi.