Health Minister Dr. R. Lalthangliana’n ZMC-ah Genome Sequencing Laboratory a hawng

Health Minister Dr. R. Lalthangliana chuan nimin khan Zoram Medical College (ZMC)-ah Genome Sequencing Laboratory leh ZMC Director Quarters a hawng a, ZMC chu kum 3 leh thla 2 leka upa ni mahse nasa takin a thang tih a takin a hmuh theih tih a sawi.

ZMC-a Genome Sequencing Laboratory leh Director Quarters hawnna puala inkhawm ZMC Lecture Hall-I a neih ah Health Minister Dr. R. Lalthangliana chuan Programme for Appropriate Technology in Health (PATH) ten khawl tha leh tangkai tak Genomic sequencing Laboratory Mizoram an rawn pe chu lawmawm a tih thu sawiin, COVID-19 hripuiin min nuai nasat lai taka kan nei hi a lawmawm lehzual a ni, a ti a. COVID-19 laka inven dan leh hri kaite enkawl dan hi danglam rih lo mahse variant hrang hrang a awm thar thin a, an Genetic Structure-ah thil inthlak a lo awmin hri inkaichhawn a awlsam lehzual thei thin a, Genomic Sequencing Laboratory hmang hian rang takin hrik thar te lo hmuhchhuah zung zung a nih chuan a inven kawngah pawh chet lak a awlsam theih phah a beiseiawm a ni, a ti a. COVID-19 Virus bakah Vector-Borne Diseases leh Superbugs Antibiotic do tlat chite pawh a chhui chhuah zung zung theih a beiseiawm tawh a ni, a ti.

Health Minister chuan ZMC chu kum 3 leh thla 2 leka upa ni mahse nasa takin a thang tih a takin a hmuh theih tih pawh sawiin, sawrkar leh mi thahnemngai ten hmangaih taka an veipuina zarah hma kan sawn chak hle tih a sawi a. ZMC-a zirlaite awmna tur Boys & Girls Hostel, zirlai 100 ve ve awm theihna tur chu kumin chhung ngei hian sak zawh fel beisei a ni tih pawh sawiin Hostel dang zirlai 100 ve ve awm theihna tur tho chu reilote ah sak tan a ni ang, a ti bawk a. Administrative Building lian tha tak kumin chhung ngei hian sa zo turin theihtawp chhuah a ni, a ti bawk.

Health Minister chuan Chief Minister nen Mobile RT-PCR Laboratory kan neih theih nan nikum atang tawh theihtawp chhuahin hma an la tih pawh sawiin, “Tunhnaiah kan dilna te tihhlawhtlin sak kan ni a, diltu hmarchhak State 4 zingah a dawng awmchhun kan ni,” a ti a, phai lamah an cheibawl mek thu leh November thla laihawl hi chuan kan hnen a rawn thlen an beisei tih a sawi bawk.

Health Minister-in nimin-a a hawn Genomic Sequencing Laboratory hi PATH (Prog-ramme for Appropriate Technology in Health), Seattle, USA in an rawn pek a ni a, anni hian US Dollar 52,000 (cheng nuai 38) chu he Laboratory din nan hian an rawn hlan a, India hmar-chhak ah Genomic Sequencing Laboratory hi Dibrugarh, Imphal leh Shilong-ah te a awm tawh a, ZMC-a mi hi a palina a ni.

Laboratory hi Virus Research and Diagnostic Laboratory (VRDL) building-ah dah niin Nanopore Sequencer hmanraw pawimawh dangte a keng tel a ni. Genomic Sequencing Laboratory-ah hian Virus Strain chi hrang hrang COVID leh COVID ni lote, Drug Resistant Genes in Bacteria te, Cancer Genomics, HLA typing etc., te hmuh-chhuah theih a nih bakah zirchianna a neih theih dawn bawk a ni.

Nimin-a hawn ZMC Director Quarters hi State sawrkar sum cheng vbc. khat senga sak niin Ground Floor leh Basement a awm a, Bedroom 4, Living Room 2 leh Choka a awm a, April ni 30, 2020 khan sak tan niin July ni 7, 2021 khan sak zawh a ni a. Zothan Consultancy Services ten a sak hna hi an thawk a ni.

Nimin-a heng thil pahnih hawnna ah hian Health Secretary R. Lalramnghaka chuan ZMC Director Quarters leh Genomic Sequencing Laboratory hawn a ni ta chu lawmawm a tih thu a sawi a. Ani bakah hian Dr. Shibu Vijayan, Global Technical Director, PATH leh Prof. N. Senthil Kumar, MZU te pawhin thu an sawi bawk a ni.