MBOCWWB hnuaia inziaklut zinga COVID-19 hri kai mi 211 te tanpuina pek an ni tawh

Mizoram Building and Other Construction Workers' Welfare Board (MBOCWWB) hnuaia inziaklut zinga COVID-19 vanga harsatna tawk mi 211 te chu 'COVID-19 Package' hnuaiah hamthatna pek an ni tawh.

Labour Employment Skill Develpment & Entrepreneurship (LESDE) Department hotute sawi danin, MBOCWWB-a inziaklut zingah COVID-19 hri kai 'COVID-19 Package' hamthatna dil mi 411 an awm tawh a, chung zinga mi 211 te chuan tanpuina an dawng tawh tih an sawi a, midang 200 erawh pek an la ni lo tih sawiin, COVID-19 vanga thi, an chhungte hnena cheng nuai 3 pek pakhat a awm tawh thu leh 'COVID-19 Package' hamthatna dawngtute hnena an sum pekchhuah zawng zawng chu tunah hian Rs. 46,68,000/- a tling tawh tih an sawi bawk.

LESDE hotute chuan, 'COVID-19 Package' an duana hamthatna awm sawifiahin, MBOCWWB-a inziaklut COVID-19 vanga thite chu an nominee te hnenah cheng nuai 3 pek theih an ni a, hri kai zingah Covid Care Centre/Community Covid Care Centre/ZMC etc-a enkawlte chu enkawlna hmuna an awm chhungin an inenkawlna atan nitin Rs. 1000/- pek an ni a, an chhuah hnuah an indawmkanna atan Rs. 10,000/- pek an ni leh tih leh hri kai, mahni Ina inenkawlte chu Rs. 10,000/- pek an nih thu an sawi. Hamthatna dilna an dawn ang ang an pe vek lo tih an sawi a, hri an kai reng em tih an finfiah leh thin tih sawiin, mi thenkhat dawt hmanga he hamthatna dawn tum hriatchhuahte pawh an awm tih an sawi.

Labour Employment Skill Develpment & Entrepreneurship Department hotute sawi danin, MBOCWWB hnuaia inziaklut hi Mizoram-ah mi sing ruk bawr vel an awm mek a, inziaklut tur hian Building construction kaihhnawiha hnathawk, kum khata ni 90 tal hnathawk an ni tur a ni a, Welfare Board-a inziaklut turin Village Council emaw, Local Council hriatpuina ken a ngai a ni. Welfare Board hnena inziaklut te hi Mistiri, Helper, Lungchher, JCB khalhtu, inhlawhfa te niin COVID-19 kaihhnawih bakah hian hamthatna hrang hrang a awm bawk a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man