Chanchin thar thenkhat :

Hnahthial DISHA Meeting

Hnahthial District Development, Co-ordination & Monitoring Committee (DISHA) thut-khawm hmasa ber chu nimin khan Hnahthial DC Office Conference Hall-ah neih a ni a, he hun hi an Chairman leh Lok Sabha MP C. Lalrosanga chuan biakhmuh theihna hmangin a kaihruai a ni. He thutkhawm ah hian Lok Sabha MP chuan DISHA Meeting hi Central sawrkar in a ngai pawi-mawh hle tih sawiin, Quarterly-a nei turin ti mah se hripui avangin a hun takah te an nei thei thin lo chu pawi a tih thu a sawi a, Hnahthial District tan bik a vawi khatna atan an nei thei chu lawmawm a tih thu a sawi bawk. He thutkhawm hi South Tuipui bialtu MLA Dr. R. Lalthangliana pawhin a hmanpui a ni.


MLA 5 ten sum thawh

PATH International NGO atanga Serkawn Christian Hospital, Serkawn Lunglei-a minute khat chhunga Oxygen Litre 800 siamchhuak thei bunna tura a hman atan Lunglei leh Hnahthial District-a MLA panga te chuan cheng nuai 4 theuh nimin khan BCM General Secretary Rev. F. Ramdinmawia hnenah an hlan a, sum thawhtute hi Lunglei East bialtu Lawmawma Tochhawng; Lunglei South bialtu Dr. K. Pachhunga; Lunglei West bialtu C. Lalrinsanga; Lunglei North bialtu Dr. Vanlaltanpuia leh South Tuipui bialtu Dr. R. Lalthangliana te an ni. Christian Hospital-a thawktute chuan Oxygen khawl hi Covid-19 chhung tan chauh nilovin damlo tam tak mamawh tur a la ni dawn tih an sawi a ni.


CMRF-ah chhunglut leh

Mizorama sawrkar hnathawk inzawmkhawm pawl, Federation of Mizoram Government Employees & Workers (FMGE&W) chuan nimin khan Chief Minister hnenah CM Relief Fund for Covid-19 atan Rs. 11,69,600/- an chhunglut leh a. Heti hian nimin thlenga CM Relief Fund for COVID-19 a sum chu Rs. 31,34,87,544/- niin Rs. 29,70,30,470/- chu hman a ni tawh a, tunah hian Rs. 1,64,57,074/- a la awm mek a ni.


Scho chungchang sawipui

National Students' Union of India (NSUI) Mizoram State chuan Zirlai tam takin Tribal Post Matric Scholarship & Pre Matric Scholarship an la dawn loh chungchangah Mizoram Scholarship Board hotute an hmu tih nimin khan sawiin, kum 2020-2021 a Zirlaite Scholarship hmuh tur hi zirlai engemaw zat in an hmuh tawh laiin mi 17,000 chuang ten an la dawng lo niin an sawi a. Hemi chung-chang ah hian Mizoram Scholarship Board chuan theihtawp an chhuah laiin, he Department enkawltu H&TE Minister Dr. R. Lalthangliana tunhnaia Delhi a zin chuan hemi chungchang hi a bawhzui lovin, Central lama thuneitute a sawi pui miahlo niin an sawi bawk.


ZPM in Public Meeting nei

Tuirial bial bye-election neih tur atana in-buatsaihna kal mekah ZPM Party chuan nimin khan Lungdai khua ah Public Meeting neiin he hunah hian ZPM Leader Lalduhoma chuan Party reng reng an that leh an chhiat kan tehna tur chu an rorêl rei leh rei loh aiin, an thiltih leh an hnathawh that leh that loh-ah a ni tur a ni  tih a sawi a. Mipuite hian MNF ni lo Congress ni lo party an duh tawh nia sawiin, “Tun kum reilote chhûnga inthlan kan hmachhawn tawh ah te hmasawn ber leh pung nasa ber chu ZPM Party a ni a, he party-ah hian mipui beisei a sang em em a, an thikthu pawh an chhe bawk a ni,” tiin mipuite an tih beidawn a thianglo tih a sawi bawk.


Pension in CS chhuak dawn

Nakum mai-a Pension-a chhuak tawh tur leh Mizoram Chief Secretary nilai Lalnunmawia Chuaungo IAS chuan Voluntary Retirement a dil hnuah sawrkar chuan phal sakin tun thla tawp hian Voluntary Pension in a chhuak dawn ta a. Thudawnna pakhat chuan Chief Secretary atanga a pension hnu hian Lalnunmawia Chuaungo hian Mizoram sawrkar-a Chief Information Commissioner (CIC) hna a chelh zui dawn nia a lan thu a sawi bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result