SEDP-in nakum atangin kuthnathawktute hnen a thleng dawn - Lalruatkima

MNF Adviser Lalruatkima chuan SEDP-in nakum atangin kuthnathawktute hnen a thleng dawn tih a sawi.

Tuirial bial Assembly bye-election neih tura Campaign mek MNFAdviser Lalruatkima hian nimin khan Mualkhang tlawhin he thu hi a sawi a, MNF sawrkar chuan a intiamna a tihlawhtling tam tawh hle nia sawiin, a la tihhlawhtlin loh te pawh tihlawhtling turin hmalam a pan zel bawk tih a sawi a. Lalruatkima chuan SEDP-in nakum atangin kuthnathawktute hnen a thleng dawn tih sawiin, “Pu Zoramthanga kaihhruai sawrkar hi kan manifesto tihhlawhtlin leh hlawhtlin loh ah min teh rawh u,” a ti a, “Hripui in min nuai chungin kan Manifesto tihhlawhtlin a tam tawh hle a. Congress Zu zawrh vanga Zoram rumna titawp turin Zu zawrh kan titawp nghal a. Lirthei neite manganna Lifetime Vehicle Tax siam danglam nghal a ni a. Kan hnamzia nena inmillo Sikul kal dan thlak danglam nghal a ni bawk. Eirukna do nan Lok Ayukta hnathawk theia siam a ni tawh bawk a ni. Zoram dung tluan kawng chhe em em pawh tunah chuan a lo zia-awm ta hle a nih hi,” a ti.

Heng bakah hian Zirtirtu indaihlohna nasa lutuk phuhruk nan zirtirtu lak belh an nih thu te, Eirawngbawlna Gas leh Buhfai-a harsatna kan tawh fo chu a lo tawp tak thu te sawiin, “Congress sawrkar laiin Zophai-ah zirlai leh Media miten Assam Police lakah kut nasa takin an tuar a. Chhantu an nei lo. Tunah chuan ramri humhim turin sawrkarin huaisen takin hma a la ta mek zel a. Ramri humhalh nan ramri-ah hmasawnna hna thawh mek zel a ni,” a ti bawk.