Thiamna platform, thiamna.com tlangzarh

Mizoram Youth Commission (MYC) Chairman Dr. Vanlaltanpuia chuan Thiamna platform, thiamna.com chu nimin khan a tlangzarh.

Nimin a thiamna.com tlangzarhna hunah hian Dr. Vanlaltanpuia chuan Mizo thalaite hi thiamthil (skills) nei tha leh hmangchang hre tak an ni tih sawiin, Mizo thalaite ngeiin an thalaipuite tanpui thei tur platform tha leh tangkai an buatsaih chu lawmawm a tih thu a sawi a. MYC chuan hetianga Mizo thalai chawikanna awmze neite a ngaihhlut thu a sawi bawk.

He tlangzarh inkhawmah hian Elvina Lalmuanpuii Leivon, IA&AS, Deputy Accountant General (CAG, Govt. of Mizoram) pawhin Academic leh Skills lama mi hlawhtlingte chanchin luankhawmna platform thar thiamna.com chuan a tiphur hle tih a sawi a. Mizo thalaiten zirna kawng an zawh zelnaa puitu platform tangkai a nih ngei a beisei thu a sawi bawk.

He hunah hian LTL. Fela, Co-Founder, Thiamna platform chuan sawizauna hun neiin, field hrang hranga Mizo hlawhtling tak takte chanchin, awmze nei zawka dahkhawm a, hengte hmanga khawvel ram hrang hranga Mizo thalaite fuih hi he platform-in a tum a nih thu a sawi bawk.