Health Minister hovin State-Level Expert Committee on COVID-19 Management ten thutkhawm an nei

State-Level Expert Committee on COVID-19 Management chu nimin khan Health Minister Dr. R. Lalthangliana hova thukhawmin an hmalakna kal mek leh hmalak belh ngai te an sawiho a. COVID-19 hri kai inringhlelte leh symptom neite tan rang taka sample test na hmun an pan vat vat a pawimawh thu tarlan a ni.

SAD Conference Hall, Aizawl-a thutkhawm ah hian COVID-19 hri leng mek dinhmun thlirin, Mizoram chhungah pawh thingtlang lamah hripui a darh nasat tak avangin District tina Dedicated COVID19 Health Centre (DCHC) bakah hmun kilkhawr zawkahte COVID-19 hri kaite enkawlna tura mamawh Oxygen leh damdawi bakah thildang te awlsam taka an hmuh theihnan an ban phaka heng thil pawimawhte hi chhawp hnaih a tul thu sawi a ni a, Area-wise a thliar a, khaw awmna hmun a zira a hmun laili deuh thingtlang khuaah te dah a pawimawh thu sawi a ni.

Hei bakah hian hri leng avanga Sample lak sak ngai tam telh telh karah Sample la tute an indaihloh avangin mipuiten awlsam taka an pan zung zung theih turin sample test na hmun ‘kiosk’ a tam thei ang ber Veng hrang hrangah dah a tul thu he hunah hian sawi niin, heng kiosk dahna tur remchang hi hmuh a har avangin ngawrh lehzuala hmalak a that thu sawi a ni a. Mahni inringhlelte leh symptom neite chuan rang taka sample test na hmun an pan vat vat hi a pawimawh hle tih pawh sawilan a ni bawk.

COVID-19 hri kai dam leh ten a hnu lamah an taksa-ah harsatna an tawk nasa tih pawh he thutkhawm ah hian tarlan a ni a, symptom nei na vak lo te zingah leh a tuar nep nia inhria te zingah pawh hetiang harsatna chi hrang hrang nei hi an awm a, an taksa peng pawimawhte bakah an hriselna hrim hrim pawhin a tawrh chhunzawm te an awm avangin hri kai damchhuak ta te chu mahni inchik reng se, a tul anga Doctor te rawn thuai thuai thin se a that thu he hunah hian sawilan a ni bawk.

State Level Expert Team on COVID-19 Management hi Mizoram chhunga COVID-19 hri kaite enkawl dan tur leh kawng hrang hranga mawhphur bik tur, mithiam rual awmna niin Health and Family Welfare Department Principal Director kaihhruaina hnuaiah member 12 an awm a, hri leng dona kawngah sawrkar-ah rawtna hrang hrang thlen tura din a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result