Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Tuirial bial-a inthlang turin inpeih thawkhat tawh

Tunkar Inrinni-a Tuirial Assembly bial Bye-Election neih tur atana inbuatsaihna chu tluang taka kalpui zel niin inthlang turin an inpeih thawkhat tawh tih Kolasib District Election Officer Dr. H. Lalthlangliana chuan a sawi.

Tuirial Bial bye-election neih tur atan hian Training ngai zawh thawkhat niin Vawiin-ah Final Training neiin inthlanna bungrua pekchhuah tan a ni anga, Zirtawpni-ah Polling Official ten an Duty na tur hmun hi an pan tawh dawn a ni. He Inthlanna aatan hian Inrinni zing dar 7:00 atanga tlai dar 6:00 thleng vote thlak a ni ang a, dar 5:00 hnulam hi Sabath Serh te tana zuah deuh tura tih a nih thu DEO chuan sawiin, Covid vei zingah Vote thlak duh an awm chuan mipui vote thlak zawh lama thlak tur a ruahmanna siam a ni, a ti. He inthlanna a Vote tla te hi Govt. Kolasib College-ah Nov. 2-ah chhiar a ni dawn a, Counting Hall hi siam fel ni tawhin, Dawhkan 7 awmin Round li a chhiar a ni ang.

Hetihlai hian Tripura a awm mek Bru ten Vote an thlak dan turah tun thlengin Election Commission of India in thu leh hla a la neih loh thu sawiin DEO chuan, hei vang hian Vote an neihna Polling Station-ah Vote thlak turin an inruahman tih a sawi a. Tripura a awm mek Tuikuk Vote nei hi 655 a nih thu leh Zodin-ah Vote 482 leh Hortoki-II ah Vote 173 a ni tih a sawi a. MCC bawhchhia a puhna ziaka an dawn te chu bawhzuiin Expenditure-ah belh sak an ni tih a sawi bawk.

Comments

Chhiar Hlawhte

Book of the Year hlan