Online sum peipunna hmangten FIR thehlutin cheng vbc. tel hloh thei dinhmunah an ding

Mizoram atanga ‘Tasman app’ a sum invest (sum peipun tuma dahkham) tu mi thahnem tak te chuan harsatna an tawk mek a, CID Crime-ah FIR thehluh ni tawhin, chiang taka hriat theih la ni lo mah se cheng vbc. 1 chuang hloh thei dinhmunah an ding mek nia thudawn a ni.

Thudawnna in a sawi danin, Mumbai lama hmunpui nei nia hriat, Tasman app hi Mizoram-ah chuan mi nawlpuiin an hriat tan leh downline an neih tan chu kumin August thla kha a ni a, hetihlai hian Mizoram a bultantute erawh chuan kumin April thla vel khan hma an la tan ni a hriat a ni a. Sum invest-tute hian October 15 atang khan harsatna an tawk tan a, Tasman app lamah sum dawng angin lang mahse an account a thleng lo a. Hemi vang hian ‘Tasman Mizo Headquarters’ tih hming inphuah lailawkin, hma an la nghal a, October 20 khan CID Crime-ah FIR thehlut nghalin, tunah hian Mizoram hmun hrang hranga sum invest-te data lakkhawm mek a ni.

Tasman Mizo Headquarters-a an hruaituten Aizawl-a Pathianni chhuak chanchinbu Zalen an hrilh danin, tuna data an lakkhawm mekah Tasman app-a sum invest mi 400 hriatchian an awm tawh a, la in report lote nen mi 1,000 bawr vel tlin an inring a. He app a pawisa tang zat pawh felfai taka chhut fel hleih theih a la ni lo a, rin danah chuan cheng vaibelchhe khat bawr vel tling tur a ngaih a ni.

Mizoram Police-te lakah an beiseina zawng zawng an nghat tih Tasman Mizo Headquarters hruaitute chuan sawiin, an hmalakna an rintawk thu an sawi a, a tul a nih phawt chuan anmahni lam pawh Tasman app Headquarters awmna hmun nia hriat, Mumbai Crime Branch lam thleng pawh a kal an inhuam thu an sawi.

Tasman apps-ah hian sum invest/recharge dan hrang hrang a awm a, chungte chu CMO-ah cheng nuai 6, CEO-ah cheng nuai 2.7, Boss- ah Rs. 90,000/-, Director-ah Rs. 45,000/-, Manager-ah Rs 15,000/-, Asst. Manager-ah Rs. 6,000 leh Full employee-ah Rs. 3,000/- te an ni.