Latest News

Skywalk Project leh Ropeway Project a thuanawp chhan chhui ngei turin sawrkar phut

Sakawrhmuituai Tlang-a Skywalk Project leh Ropeway Project a thuanawp chhan chu chhui ngei tura MNF sawrkar an phut thu MPCC thupuangtu Dr. Lallianchhunga chuan a sawi.

Tourism Minister Robert Romawia Royte-in Lungdai khaw mipuite hmaa Skywalk leh Ropeway siam tur thuanawm chhan Lokayukta leh CBI te chhui tir an tum thu a sawi chungchang nimin-a Aizawl Press Club-a thuthar thehdarhtute an kawmna ah sawi chhuakin Dr. Lallianchhunga chuan, “Hemi chungchang hi Congress party in ngun takin kan chhui a, thil lo kal tawhte kan thlirlet a. Chuta tanga kan thil hmuhchhuah chu, Sakawrhmuituai Tlang-a Skywalk project hi Congress party sawrkar tlak tawh hnu, MNF sawrkar thar a din tawh hnu kum 2019 thlengin hna thawh a ni a. MNF sawrkara Tourism Minister Pu Robert Romawia Royte ngei pawhin kum 2019 khan a tlawh nghe nghe tih Lungdai khawtlang hruaitute'n an sawi a ni,” a ti.

Tuna Skywalk hnathawh kal lai mek hi a changtu Tourism Department Minister Robert Romawia Royte hi a hrechiang bertu a nih thu sawiin MPCC thupuangru chuan, “Tourism Department in Electronic Book an tihchhuahah, sawrkar hmalakna kal mekah Skywalk project hi tarlan a la ni bawk a. Chutah chuan, cheng nuai 9907 project hlawhtlinna atana sum a awm thute pawh chiang takin tarlan a ni a. A Project-ah hna kal lai mek tiin nikum lawkah pawh anmahni department ngeiin an ziak a ni,” a ti bawk.

MPCC thupuangtu Dr. Lallianchhunga hian Tourism Minister-in Lungdai-a a sawi ang hian Lokayukta emaw, CBI emaw in chhui ngei se tia an phut thu sawiin, “An chhui tir ngei tur a ni. Durtlang atanga Chaltlang inkar Ropeway Project a tawp chhan hi NECS project siam a nih loh avanga Utilisation Certificate sign duh loh a ni em tih thlengin CBI in chhui rawh se,” a ti a. “Hetia CBI chahluh an tum rau rau a nih chuan, CBI an chhui tir ngam loh GAD hnuaia Civil Aviation Wing-a Principal Consultant Pu J. Lalhmingliana thubuai pawh hi CBI chhui tir nghal law law turin MNF sawrkar hi Congress party hian kan ngen nghal bawk a ni,” tiin thuthar thehdarhtute hnenah hian a sawi bawk.

Comments

Popular News (Last 30 Days)