Latest News

Chanchin thar thenkhat :

Street for people campaign

Aizawl Smart City hmalakna-in Inrinni khan Aizawl Khatla-a Chawnga Road, Presbyterian Biak In thlang kawng kual zau laiah 'Streets for people' campaign neih a ni a, Aizawl Smart City Limited chuan mipui te Smart City simpui turin an ngen a ni. He hmlakna atan hian helai hmun kawng kam hmun awl laiah thut hahchawlhna hmun leh naupang infiamna hmun te an siam a, a duh tana ei in lamna tur Food Truck te an chhawp a, a mamawh tan BP enna leh inbukna te dah a ni bawk. He hmalakna hi Khawpui changkang dangte anga kawngpui kam leh hmun awl remchang lai awm theite mipuite tana hman tangkai a nih theih nana inkawhhmuh tumna (campaign) a ni a. Hetiang hi buatsaih a nih theih nana khawtlang hruaitute leh thuneitu sangte hnena ngaihtuahna thar seng tura infuihna leh inngenna a ni.


Hnahthial DC in hmalak tum

Hnahthial District Bawrhsap R. Lalremsanga chuan Inrinni khan an District-a Thiltlang khua tlawhin ‘All Mask Campaign’ kalpui mekah CO-VID-19 hri kai te enkawlna, 3C-a hman turin Mask, Hand Sanitizer leh pawisafai te a hlan a. He hunah hian Bawrhsap chuan Hnahthial District-a a awm hian tum bulfuk tak a neih thu sawiin, ram changkan leh changkan loh tehna pawimawh tak chu Hriselna a ni tih a sawi a, hriselna kawnga hmasawnna ber District,  Faina leh Thianghlimna kawnga District titha ber, ziak leh chhiar thiam tamna District ni tur tan lak, zuk leh hmuam bakah ruihhlo chi hrang hranga laka fihlim ber District ni tura tan lak te a nih thu a sawi bawk.


Kawng siamtha turin ti

Lawngtlai District Bawrhsap Dr. Andrew H. Vanlaldika chuan Lawngtlai District chhim lam leh khawthlang lam inkalpawhna chu tha zawka siam turin BRTF leh KMMTTP hnathawktu te a hrilh a. Helai kawng-a Lei dawh turte pawh a thar dawh a nih hmain Lei hlui chu 407 Truck rit phur in a zawh theih tura a theih anga thawm-tha turin a hrilh bawk a ni.


Tuirial bial-ah ZMP campaign

ZPM Working President K. Sapdanga chu Inrinni khan  Tuirial bial-a Serkhan leh Bukpui khua ah te Campaign in tunhnaiah mi thenkhat khat ten ZPM leh MPF te in kârah hêm thlâk an tum nia a lan thu a sawi a, “MPF leh Political party te thawh-hona thuthlung hi Political party zawng zawng ten kan sign vek a, keini ZPM party pawh hian zawm hram hrâm i tum ang u tih hi kan in zirtir dan a ni,” a ti. ZPM Working President chuan, “He ram ah hian ram rorelna tha awm se kan duh a, thil tha a pian theih nân thil tha lo kan ti dâwn em ni? Hlemhletna in vote kan zawng tur a ni em ni?” a ti a, “ZPM Candidate hian i vote kha sum a rawn lei a tum a nih chuan, lo vote loh phah ngam rawh,”  tiin bawlhhlawh taka tlin ai chuan, thianghlim taka tlak an duh zawk tih a sawi bawk.


BJP in Campaign nei zel

Tuirial bial bye-election neih tura campaign mek BJP Candidate K. Laldinthara chuan Khamrang khua tlawhin tun tum inthlanna ah hian thlantlin a nih chuan Tuirial Bial tan Sawrkar lai MNF tih theih loh, Congress leh ZPM tan a tihngaihna awm lo tur chu, Central a BJP Sawr-kar avangin Bial mipui te mamawh tih theih loh tur a awm a rinloh thu leh Central-ah pa an nei tih mipui ten an hriat a ngai tih a sawi a. BJP chuan Development hnathawh aia ngaih pawimawh an nei loh avangin Tuirial Bial ah hian Inkalpawhna te, ei leh bara hmasawnna tur te, Waterway kaltlanga inkalpawhna te bakah mipui mimir mamawh hrang hrang tun Term reilote chhung hian tih theih a ni dawn tih he hunah hian a sawi bawk.


RT-PCR Laboratory dinna tur hmun tlawh

Lunglei Zotlang Tourist Lodge-a RT-PCR Laboratory dinna tur chu Inrinni khan Mizoram Youth Commission (MYC) Chairman Dr. Vanlaltanpuia MLA chuan a hmunah tlawhin sum mamawhna a awm chuan pawisa thawh a inhuam thu a sawi. RT-PCR Laboratory dinna tur a tlawhna ah hian Dr. Vanlaltanpuia chuan sawrkar sum harsatna tawh mek avangin Lunglei-ah RT-PCR bun theih a ni thuai lo chu sawrkar pawhin hreawm a tihtak zet thu a sawi. Hmabak la awmah sum mamawhna awm thei ah amah pawhin pawisa thawh a inhuam thu leh thawktute pawhin sum mamawhna a awm chuan a hnenah dil turin a hrilh a ni.

Comments

Popular News (Last 30 Days)