Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Chanchin thar thenkhat :

‘The Good Samaritan’ Scheme

Sawrkar laipui-a Ministry of Road Transport & Highways (Road Safety) chuan tun thla ni 3 khan Road Accident kaihhnawih Scheme thar, ‘The Good Samaritan’ chu a tichhuak a, He Scheme-in a tum ber chu lirthei chetsualna avanga hliam tuar leh tanpui ngaiten a hun tak (Golden Hour) a tanpuina an hmuh vat a, nunna hlu tak chhanhim anih theihna atan a ni a. Hetiang mi nunna chhanhimtu chuan he Scheme hnuaiah hian Sawrkar atangin pawisa fai Rs 5000/- a hmu thei dawn a ni. He Scheme hnuaia lawmman dawng thei turte thlang tur Committee siam a niin, tehkhawng hrang hrang pawh mumal taka duan a ni a, hrechiang duh chuan Transport Department Office hrang hrang-ah zawhfiah theih a nih bakah Transport Department website- transport.mizoram.gov.in-ah en theih a ni ang.


Law Minister in hmanpui

Law & Judicial Minister T.J. Lalnuntluanga chuan nimin khan Govt. Champhai College-in Graduation Day an hman chu khuallian niin a hmanpui a, he hunah hian TJ. Lalnuntluanga chuan mahni College zirchhuahna ngeia Graduation Day a hmanpui thei chu ropui a tih thu sawiin, zirlaite chu chin tawk neia Social Media hmang thiam tura fuihin, thil tangkai tak ni mahse a hman dan kan thiamloh chuan a inkahpukchaw chho zel a, zirna leh hna dang thawh a tibahlah a, nakin zela ram economy thlenga nghawng thei a nih avangin hman dan kan thiam a tul hle a ni, a ti. Nimin-a he hun hman ah hian he College hnuaia Stream hrang hrang 4 atanga Graduate thar mi 156 hnenah Graduation Certificate hlan niin chawhma lamah zirlai lut tharte lawmna neih a ni bawk.


Thutlukna puan hun sawn

Mizoram Chief Minister Zoramthanga eiru a puhna thubuai chungchanga Court thutlukna nimin-a puan tura tih tawh chu Tuirial bial-a Assembly bye-election a vote tla te chhiar zawh hnu, Nov. 3-a puan tura sawn a nih thu kan thudawnna chuan a sawi.


Raltlan tan In sak sak dawn

Hnahthial District chhungah Myanmar atanga raltlan rawn lut an awm belh zel avangin nimin khan Hnahthial Electric Veng Branch YMA te chuan raltlan chenna tur sak hna an thawk tan a, nimin khan khawl hmanga In sakna tur an laih bakah member thenkhat in In sakna tur chak an lakhawm bawk a, Vawiin hian In sak tur atan a ban phun theih beisei a ni. Hnahthial District-ah hian raltlan rawn lut mi 2,234 awm mekin an zingah hian chhungkaw 390 an tel a ni.

Hetihlai hian Lawngtlai District-ah pawh Myanmar atanga raltlan rawn lut hi pung zelin nimin thleng khan mi 2984 an rawn lut tawh a, heng te hi a theih angin khaw hrang hrang ten an lo tuamhlawm a ni.


Ruahmanna sawihona nei

North Eastern Council (NEC) atanga RD Block hnufual deuhte tihhmasawnna tur ruahmanna hnuaia Lawngtlai District chhunga Rural Development Block pahnih - Bungtlang 'S' leh Chawngte RD Block tana Block Development Plan siam tur chungchang chu nimin khan Lawngtlai DC Andrew H. Vanlaldika hovin a Pisa-ah sawiho a ni a. NEC hnuaia hmasawnna hnathawh kalpuina turah hian Block pahnih tan hian cheng vbc. 5 ve ve leh Identified Village (Bungtlang 'S') tan cheng vbc. 2 ruahman a ni.


DTO Office sak dan tur en

Champhai-a cham mek Transport Minister TJ.Lalnuntluanga chuan nimin khan Champhai Dawrkaikawn-a District Transport Officer Office tlawhin, Building hlui chhe tawh tak an luah mek lai sakthat dan tur a hmunah a en a. Cham-phai DTO Office hi Disaster Management Authority atangin thiat tura thutlukna siam a ni tawh a, Office hmunhma zau zawk, tualzawl-a Motor Parking zau leh Motor lian tan pawha pan remchang zawk awm theihna tur hmun dang dapin hmuh a nih loh avangin a hmun ngai ah sak a ni ang.


BJP in Campaign bei ngawrh

BJP Mizoram Pradesh chuan tun thla ni 30 a Tuirial Bial Assembly bye-election neih tur atan ngawrh takin Campaign an kalpui mek tih an sawi a, an President Vanlalhmuaka chuan Tuirial bial a khaw hrang hrangte tlawhin BJP hmathlir leh hmalakna te hrilhfiahna hun a nei tih an sawi. Heng khaw hrang hrang a tlawhna ah hian BJP President chuan tun hunah hian Opposition bial nih emaw, Ruling bial nih hian awmzia a neih loh dan a in ang reng tih sawiin, “Central atanga mamawh sawichhuak thei leh tlangnel taka Central Minister te be thei hi Mizoram a MLA bial tin ten tun huna kan mamawh ber chu a ni,” tiin mipui te hma-sawnna tak tak thlen theitu chu Central-a sawrkar BJP an nih thu a sawi bawk.


Mi thar lawmluhna nei

ZPM Party chuan nimin khan New Bui-lum khua ah mithar lawmluhna hun hmangin he hunah hian ZPM Leader Lalduhoma chuan ZPM chuan a thlawna sem tiamin vote a zawng ve ngai dawn lo tih sawiin, “Party dang pawh hian sem tiam zawngin vote zawng tawh lul suh se. Ram development mai bakah mihring development hi ZPM in kan aupui a ni,” a ti.  He hunah hian mithar mi 50 an lawmlut tih an sawi.

MNF Party pawhin nimin khan Zuangtui ah mithar lawmluhna hun hmangin MNF Adviser Robert Romawia Royte chuan mi 47 a lawm-lut a, an Party President Zoramthanga chu midik leh Pathian tihmi a ni tih miten an hria tih he hunah hian a sawi bawk.

Comments

Chhiar Hlawhte

Book of the Year hlan