All Mask Campaign kalpui chhunzawm zel dawn

Health Minister Dr. R. Lalthangliana chuan Mizoram-a ‘All Mask Campaign’ kalpui mek chu November 15, 2021 thlengin kalpui leh tur a nih thu a sawi.

Mizo Students’ Union (MSU) General Conference vawi-19-na nimin-a Aizawl Chanmari YMA Hall-a neih a hmanpuina ah he thu hi sawiin Dr. R. Lalthangliana chuan CO-VID-19 hripui lengin khawvel a tuam mek a, he hripui hi Mizoram pawhin kan tuar nasa hle a. Amaherawhchu tlawmngai pawl hrang hrang leh Kohhran, Sawrkar hnathawk leh mipuite thahnemngai takin Covid-19 do tur hian lungrual takin ke kan pen chhuak ho thei chu a ropuiin he thawhhona hian min funkhawm tha em em a, Mizo nih a ti nuam tak zet a ni, a ti a. Vaccine lak pawimawh zia pawh sawi langin Minister chuan, thalai kalkhawmte chu Vaccine la ngei turin a fuih a, a tam thei ang berin vaccine an lak theih nana tan lak pui turin a sawm bawk a ni.