Mizoram-ah hri kai hmuhchhuah tlahniam zel

Mizoram-ah COVID-19 hri kai hmuhchhuah an tlahniam zel a, Inrinni khan Sample 6037 enfiah niin heng atang hian hri kai mi 572 hmuh belh leh niin Sample enfiah atanga za zela 9.47 te chuan hri an kai a ni.

Inrinni khan ZMC-a RT-PCR Laboratory-ah Aizawl leh Serchhip District atanga Sample lak 744 enfiah niin heng atang hian hri kai mi 98 hmuhchhuah an ni a, an zinga 94 te chu Aizawl District ami te niin Veng leh khua 32 ami te an ni a, Veng leh khaw mal-a hri kai mi 10 aia tam hmuhna pahnih chiah a awm a ni. Hei bakah hian Serchhip District atanga Sample thawn 22 atangin hri kai mi 4 hmuh an ni a, an vai hian Thenzawl khua vek an ni. Inrinni khan Fluorescent Immunoassay Test hmangin Aizawl-ah Sample 47 enfiah ni bawkin heng atang hian hri kai mi 10 hmuh an ni bawk a, an vai hian Aizawl khawpui chhung ami te vek an ni.

District hrang hranga TrueNat Laboratory-ah Sample 230 enfiah ni bawkin heng atang hian hri kai mi 37 hmuh an ni ve leh bawk a, an zinga 21 te chu Champhai District atanga hri kai hmuh te niin Lunglei District-ah 9, Lawngtlai District-ah 5 leh Hnahthial District-ah mi pahnih te an ni.

Rapid Antigen Test hmangin Inrinni khan Sample 5016 enfiah ni leh bawkin heng atang hian hri kai mi 427 hmuh an ni bawk a, an zinga 194 te chu Aizawl District-a hri kai hmuhchhuah niin Serchhip District-ah hri kai mi 61 zet hmuh an ni bawk a, Lunglei District-ah 55, Mamit District-ah 48, Champhai District-ah 25, Lawngtlai District-ah 18, Hnahthial District-ah 12, Saitual District-ah 7, Kolasib District-ah 5 leh Khawzawl District-ah hri kai mi pahnih hmuh an ni bawk.

Nimin khan tlai dar 5:00 thlengin Mizoram-a hri kai 796 enkawl dam niin heti hian nimin tlai dar 5:00 thlenga Mizoram-a hri kai hmuh tawh chu 1,17,261 niin an zinga 1,08,707 te enkawl dam an ni ta a, hei hi hri kai atanga chhutin zaa 92.71 niin hri kai enkawllai 8143 an la awm a ni. Mizoram-a hri kai zingah mi 411 zet boral tawhin Inrinni khan mi 7 leh nimin khan mi pathum an boral belh leh a ni.