Chanchin thar thenkhat :

Chief Secretary inthlak dawn

Mizoram Chief Secretary Lalnunmawia Chuaungo IAS in Voluntary Pension a dilna Gujarat sawrkar in a pawm sak hnuah Mizoram sawrkar chuan tun thla ni 31 khian a chhuahtir dawn ta a. Mizoram Chief Secretary hna thawk tur hian nimin vek khan Union Home Ministry chuan Renu Sharma IAS (AGMUT 1988) chu ruatin thla thar atangin he hna hi a chelh zui ang.


Siaha-ah School kai tan dawn

Nimin khan Siaha-ah District Level Task Force Committee on Education chu District Bawrh-sap leh DDMA Chairman Kesavan R IAS hova thukhawmin an District dinhmun an thlir hnuah thla thar, Nov. 1, 2021 atangin Class 10 leh 10+2 zirlaite chuan SOP leh CAB zawm chungin Class kal tan tawh se tiin an rel a. Siaha District-ah hian Primary School 131,Middle School 77,High School 26 leh Higher Secondary School 7 awmin Zirlai naupang zingah 358 in COVID-19 kaiin 356 enkawl dam an ni tawh a, tunah hian hri kai enkawllai mi 2 an la awm a ni. He hunah hian Zirtirtute zingah mi tlemte tih loh chuan Vaccine an lak vek tawh thu tarlan a ni a, School tin ten SOP leh CAB an zawm that leh that lo te vil a, thla khat hnua Committee hnenah report pe turin Education Department hotute a ngen a. Chumi report a zir chuan Middle School leh Primary School te hawn dan tur rel leh a ni ang.


Sawrkar in hmalak nat tum

Mizoram sawrkar chuan thuchhuah siamin Halpuah, halmawi, Sky Lantern leh puakthei thildang sawrkarin a khap mek te chu kumin Kris-mas, Kumthar leh Puja vuakvet ah mitinin an zawm theih nan leh a tilui an a awm a nih chuan hetiang mite vaihma chu sawrkar chuan ngawrh takin a kalpui dawn tih a tarlang a, hemi atan hian tlawmngai pawl hrang hrangte pawh an tang hle tih a tarlang bawk. Sawrkar thuchhuah in a tarlan danin nikum Krismas vuakveta hetiang kaihhnawiha dan bawhchhe man zingah Court case kal lai 15 tun thleng hian chinfel loh 15 a la awm a ni.


Candidate in FIR thehlut

Tunkar Inrinni-a Tuirial bial bye-election neih tura MNF Candidate K. Laldawngliana chuan nimin khan Cyber Police Station, Aizawl-ah FIR thehlutin Oct. 28, 2021 zing dar 9:30 vel khan Facebook Group pakhat ‘Zoram Politics Group 1’ ah ‘Ruattea Ralte Ruattea Ralte’ inti chuan ‘MI-ZOFED Chairman K. Laldawngliana chanchin tawi’ tiin a chanchin bu diklo takin a post niin a sawi a. Tuirial bial-a vote thlak mai tawh tur den-chhena hetianga diklo tak maia inpuhna hi thalo a tih thu leh a post tu hi a rang thei ang bera chhui-chhuah saka Dan anga hrem a nih ngei theih nana hma lak sak turin a ngen nghal bawk a ni. FIR hi a aiawhin MNF Legal Board leh MNYF Hqrs. hruaitute ten an thehlut a ni.


Hmuncheng khua ah In kang

Khawzawl District chhung Hmuncheng khuaa Biakchungnunga In chu nimin zing dar 3:00 vel khan bungrua engmah chuh hmanloh in a kang a, In neitute hi buh seng-a ram an riah lai a nih avangin mihring thi leh hliam tuar an awm lova, an thenawm-a awm Hrangchung-nunga chuan Gas puak avangin hliam a tuar thung a ni. Khawzawl DC CC. Lalchhuangkima chuan nimin khan vanduaina thlenna hi a hmunah a tlawh a, SDRF atanga tanpuina Rs. 1,01,900/- a pek bakah hnatlang thingpui inna tur Rs. 2,000/- leh hliam tuar Rs. 1000/- a pe a ni. Bialtu MLA leh Deputy Chief Minister Tawnluia pawhin Rangva Bundle 5,  Rs. 2,000/- leh a tul a hman turin Silpauline 2 a pe nghal bawk.


ASF vangin Vawk 29,632 zet thi tawh

AH&Vety Department ten an chhinchhiah danin nimin thleng khan Mizoram-ah African Swine Fever (ASF) vangin District 11-a khaw 271-ah Vawk 29,632 a thi tawh a, hri lenna khua ah hian Vawk 10,380 suat a ni tawh bawk a, nimin khan ASF vangin Vawk 31 a thi leh bawk a ni. Mizoram hmun hrang hrangah chhan hriatloh leh ASF rinhleh vanga Vawk thi zat chu nimin thleng khan 513 an tling tawh bawk a, tunah hian hri lenna ni a rinhleh veng leh khua 95 awm mekin ASF hri leng hian ziaawm lam a pan hret hret niin a lang.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result