Hri kai 44 hmuh belh an ni

Serchhip District-ah COVID-19 hri kai la hmuhchhuah belh zel niin nimin khan hri kai mi 44 lai hmuh belh leh an ni.

Nimin-a hri kai hmuh thar te zinga a tam ber te hi Serchhip Town-a hri kai hmuhchhuah niin Serchhip-ah hri kai mi 18 leh Chhiahtlang-ah 17 hmuh an ni a, heng te bakah hian Thenzawl-ah hri kai mi 6, Keitum-ah 2 leh Khawbel-a pakhat hmuhchhuah an ni.

Niminpiah khan Serchhip District-a TrueNat Laboratory-a Sample enfiah te atangin hri kai mi 8 hmuh niin an vai hian Serchhip khawpui chhung ami te vek an ni a, nimin lama Rapid Antigen Test hmanga hri kai hmuhchhuah kan rawn tarlan bakah khan Serchhip khawpui chhungah hri kai mi 2 leh East Lungdar leh Hualtu ah hri kai mi pakhat ve ve hmuh belh an ni bawk.

Nimin khan Serchhip District-a hri kai enkawl te zingah mi 154 zet enkawl dam an awm a, tun tum hi Serchhip District bikah ni khat-a hri kai enkawl dam an tam ber tum nia hriat a ni a, nimin-a enkawl dam zinga a tam zawk te hi Serchhip khawpui chhung ami te an ni. Heti hian nimin tlai thleng khan Serchhip District-a hri kai hmuhchhuah chu 4112 niin an zinga 3447 te chu enkawl dam an ni ta a, hri kai hmuh-chhuah atanga za zela 83.82 te chu enkawl dam niin hri kai enkawllai 656 an la awm a. Hri kai zingah mi 9 an boral tawh bawk a ni.