Latest News

COVID-19 hri kai hmuhchhuah tlahniam zel

Mizoram-ah COVID-19 hri kai hmuhchhuah tlahniam zelin niminpiah khan Sample 6831 enfiah atangin hri kai mi 547 hmuhchhuah an ni a, Sample enfiah atanga za zela 8.01 te chuan COVID-19 hri an kai a ni.

Niminpiah khan ZMC-a RT-PCR Laboratory-ah Sample 554 enfiah niin heng atang hian hri kai mi 80 hmuhchhuah an ni a, an vai hian Aizawl District atanga Sample lak vek an ni a, Veng leh khua 27 atangin hri kai hi hmuhchhuah niin Sesawng-ah hri kai mi 11 leh Ramhlun North-ah 1o te chu Veng mal-a hri kai hmuhchhuah tamna an ni. Fluorescent Immunoassay Test hmanga Sample 30 enfiah te atangin hri kai mi 10 hmuh an ni bawk a, an vai hian Aizawl khawpui chhung ami te an ni.

Heng bakah hian District hrang hranga TrueNat Laboratory-ah Sample enfiah 311 awmin heng atang hian hri kai mi 70 hmuh an ni bawk a, an zinga 28 te chu Lunglei District ami te niin Mamit District-ah 14, Champhai District-ah 9, Serchhip District-ah 8, Kolasib leh Lawngtlai District-ah 3 ve ve, Siaha leh Hnahthial District-ah 2 ve ve leh Aizawl District-ah pakhat te an ni.

Niminpiah khan Rapid Antigen Test hmangin Mizoram-ah Sample 5936 enfiah ni leh bawkin hri kai mi 387 hmuh an ni bawk a, an zinga 164 te hi Aizawl District-a hri kai hmuhchhuah niin Serchip District-ah 58, Champhai District-ah 43, Lunglei District-ah 42, Kolasib District-ah 21, Hnahthial District-ah 18, Mamit District-ah 16, Lawngtlai District-ah 14, Siaha District-ah 8, Saitual District-ah 2 leh Khawzawl District-ah hri kai mi pakhat te an ni.

Nimin khan tlai dar 5:00 thlengin Mizoram-a hri kai te zingah mi 428 te chu anmahni enkawlna hmun atanga chhuahtir an ni ve leh a, heti hian nimin tlai dar 5:00 thlenga Mizoram-a hri kai hmuhchhuah chu 1,19,469 niin an zinga 1,12,180 te chu enkawl dam an ni tawh a, hei hi hri kai hmuhchhuah atanga chhutin zaa 93.88 niin hri kai enkawllai 6891 an la awm a ni. Nimin khan tlai dar 5:00 thlengin hri kai zingah mi pakhat boral awmin Mizoram-a hri kai zingah mi 425 an boral tawh a ni.

Comments

Popular News (Last 30 Days)