Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

Cricket League-ah AO3C an champion

Cricket Association of Serchhip District (CASD) in an buatsaih ‘Serchhip District Cricket League’ vawi 1-na chu Inrinni khan khelh zawh niin AO3C te chu an champion.


CASD hnuaia Affiliated Club te inelna, ‘Serchhip District Cricket League’ hi DC Playground, Khawtetlang-ah khelh niin Team pali tel te an intum kual theuh hnuah point hmu sang pahnih, AO3C leh Tuikhuah Veng CC te hian Inrinni khan Final hi an khel a, he inkhel ah hian Tuikhuah Veng CC te hian vaw hmasa in Over 20-ah Run 147 zet siamin mi 3 chiah an out a, AO3C te hian Wicket an lak hleih theihloh avangin an buai phah lek lek niin a lang a, TKCC in target an siam hi Serchhip Level-ah chuan sang tak a nih bakah T20-ah chuan target pangngai tak a ni bawk a, champion mai thei dinhmun ah an ding a ni.

AO3C ten vaw chhunzawm leh leh nghalin Over hmasa berah TKCC te hian Wicket an la nghal a, beiseina nei sang viau mah se a hnua rawn lut Kumar Abhishek erawh an ngam ta lo thung a, Kumar Abhishek hi a tawp thlenga dingin run 93 zet a siam a, midang in run siampui ve zeuh zeuh bawkin Over 18.4-ah Wicket 7 hloh chungin an target hi an umphak a, Wicket 3 in AO3C te hian hnehna an chang ta a ni. He inkhel ah Run 93 siamtu Kumar Abhishek hi Man of the Match-ah thlan a ni bawk.

Serchhip District Cricket League-a champion AO3C te hian Trophy leh Rs. 20,000/- dawngin pahnihna Tuikhuah Veng CC te hian Trophy leh Rs. 10,000/- an dawng bawk a, Batsman tha berah Kumar Abhishek (AO3C) chu thlan niin Bowler tha berah Lalrinfela (TKCC) chu thlan a ni bawk a, Best Young Player atan R. Lallianpuia (AO3C) chu thlan ni bawkin heng mimal-a tha ber thlanchhuah te hian Trophy leh Rs. 1000/- theuh an dawng bawk. League khelh chhung zawka inkhel apiang hian a chak zawkin Rs. 2000/- leh a chak lo zawkin Rs. 1000/- an dawng ziah bawk a ni.

Serchhip District Cricket League Final hi Cricket Association of Mizoram (CAM) atangin Vice President P. Lalremruata leh Treasurer Zosangliana ten rawn hmanpuiin Serchhip-a Cricket game than dan chu lawmawm an tih thu leh thla thar mai-a President Cup khelh tur atan pawh Serchhip District chu beiseiawm pawl an nih thu an sawi a. Serchhip District Sports Committee atangin President K. Tlangthanmawia leh Secretary, R. Vanlalhruaia te pawhin an hmanpui bawk a ni.

Comments

  1. Rehguar taka newspaper update thin kan nei hi Editor kan chhuang hle mai che

    ReplyDelete

Post a Comment

Chhiar Hlawhte

Book of the Year hlan