Raltlan rawn lut tlem hret

Myanmar ram buaina avanga Mizoram-a raltlan rawn lut chu tunhnaiah an tlahniam hret nia hriat a ni a, amaherawh chu Chin State-ah inkahna a awmchhoh zel avangin raltlan lo lut leh huk thei dinhmunah a ding mek thung.

Champhai District-a Vaphai khuaah Inrinni khan raltlan mi 5 an lo luhbelh tihloh chu tunhnai ni 3 chhung velin Champhai District-ah hian raltlan lut an awm lova. Hnahthial District-ah nimin leh Inrinni khan raltlan mi 23 an luhbelh bawk.

Tun dinhmunah Myanmar nena ramri intawm District 5-ah raltlan sing khat dawn an awm a, Lawngtlai District-ah 3,022, Hnahthial District-ah 2,270, Siaha District-ah 1,362 leh Lunglei District-ah 237 an awm mek a. Raltlan awm tamna ber tura ngaih Champhai District-ah tuna awm zat hi a hriathleih theih loh chungin East Tuipui assembly bialchhungah 2,600 chuang an awm a ni. 

Hetihlai hian Myanmar ram buaina ah hian Chin State khawpui Hakha-ah sipai 700 vel thawnluh an ni tawh a. Hakha leh Falam inkar kawngah tualchhung mi ralthuam lekte leh Chin National Army (CNA) helpawl te’n sipai kal vel hi hmun engemawzatah an lo lambun tawh a. CNA hmunpui Camp Victoria luhchhuah tuma Mizoram ramri lama luh thlak an tum ni a an hriat avangin Thantlang bakah Camp Victoria panna kawngah Lei an bomb chhe nual tawh bawk.

September ni 7-a National Unity Government (NUG) an tih mai, Sipaiin an paihthlak tak sawrkar indinleh-in ‘Spring Revolution’ a puan hnu khan Chin State-ah hian tualchhung mi ralthuam lekte leh CNA tangrual hian hmun hrang hrangah sipai chevel lambunin sipai inkulhna hmun engemawzat an bei tawh a. Hetiang a nih avang hian sipai tam zawk tirhluh belh zel an ni a, inkahna hi a hluar zel chuan Mizoram-ah raltlan hi an rawn luh belh zel dawn niin a lang.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result