Latest News

KRAM Infracon Pvt. Ltd. hnuaia Contractor ten an harsatna tawh hrang hrang an sawipui

Aizawl atanga Tuipang thleng National Highway-54 laihzauh leh siamthat hna thawh meka Package-2, Baktawng leh Keitum inkara KRAM Infracon Pvt. Ltd. ten an thawh mek hnuaia Contractor te chuan nimin khan Serchhip-a thuthar thehdarhtute leh tlawmngai pawl aiawhte kawmin an harsatna tawh te an sawipui.


Serchhip Press Club-a he inkawmna hi an Convener, Zadingliana, New Serchhip Venglai chuan kaihruaiin he sawihona a tel tur hian he hna enkawltu NHIDCL bakah an hnuaia Contractor, KRAM Infracon Pvt. Ltd. bakah SGI te pawh an sawm thu leh amaherawh chu an rawn telloh thu a sawi a. Tuna an harsatna tawh mek chu an hnathawhna Bill pek chungchang a nih hnu sawiin, heng an hna te an thawh dawna an inremna siam ah thla tin ni 1-30 chhunga an hnathawhna Bill chu ni 15 chhunga pek zel tur a nih thu leh a tir lama hnathawk ten thla tin ni 27-ah an hnathawh te teh fela Bill pawh an hmuh nghal zel thu laiin tunah hian Fur te thlengin, an hnathawh, a bikin Retaining Wall chhia te a tam avangin Bill hi an hmuh that takloh thu an sawi a. June thla a an hnathawhna Bill pawh an la lak kim loh thu leh hei vang hian hnathawh kawngah harsatna an tawh thu an sawi bawk a ni.

Thuthar thehdarhtute zawhna chhangin Contractor te chuan, tunah hian Retaining Wall an siam tawh zinga zaa 80 vel zet chu a chhe leh nia ngaih a nih thu sawiin, hei hi Contractor te mawhphurhna a nih theih rualin hnathawh thalo zaa 80 vel chu KRAM Infracon Pvt. Ltd. lam mawh ni zawka an ngaih thu an sawi a. Retaining Wall siamna tur Basement an siam chu meter 5 tur te a nih laiin leivung ah te lung an rem tir thin thu an sawi a, an hnathawhna hmanrua- Lung, Cement, Balu leh Tui te chu Company lam atanga an dawn vek a nih avanga harsatna an tawh dan te pawh sawiin, an hnathawh te hi nitin Site Engineer ten an vil reng chungin anmahni ngei pawhin tha tawklo an tih thin thu an sawi a. Lung supply thenkhat chu chawi sawn ngamloh khawpa keh leh mai thin te pawh a awm thu an sawi bawk.

KRAM Infracon Pvt. Ltd. hnuaiah hian Contractor Mizo 40 vel an awm thu leh hnam-dang pawh engemaw zat an awm thu he hunah hian sawilan niin hnathawktu chungchang ah ram lailung fa ni lo rawih an tam thu pawh tarlan a ni a, State pawn atanga hnathawktura an hruailuh zingah ILP pek chhan ang ni lova hnathawk, ILP hmang diklo an awm nia an hriat thu pawh sawiin, hna an thawhna kawngah ram leilungfa nekchepna a awm nia an hriat thu te pawh an sawi bawk.

He hunah hian tlawmngai pawl lam aiawh te chuan he kawngpui siam hna thawh mekah hian tha taka hna thawh an duh thu leh harsatna an tawh te pawh NHIDCL leh KRAM Infracon Pvt. Ltd. aiawhte nen inbiakna an neih hunah an sawilan tur thu an sawi a. Hmanraw thalo Supply te pawh a theih anga hnawl zel tura chahin, thuthar thehdarhtu te leh tlawmngai pawl te pawhin a remchan anga hnathawh hi enfiah thin nise an ti bawk.

Nimin-a he hun hman zawh hnu hian KRAM Infracon Pvt. Ltd. hnuaia Contractor te hian hmalakna tur sawizuiin pawl an din nghal a, hruaitu tur pawh insiam nghalin, heng an harsatna tawh hrang hrangah te hian a tul angin hmalak chhoh zel an tum a ni.

Comments

Popular News (Last 30 Days)