India ram-a Police an Duty laia hmelma kut-a thi te zahna leh chawimawina hun hman a ni

India rama Police an Duty laia hmelma te kut tuara boral te hriatrengna leh zahna hlanna ni, Police Commemoration Day chu nimin khan rampumah hman a ni a, Serchhip-ah pawh he ni pual hian Serchhip SP Conference Hall-ah SP, Stephen Lalrinawma hovin hun hman a ni.

Serchhip-ah hian Police Commemoration Day hi SP Office Tual-ah hman tura ruahman ni mah se khaw awmdan in a zirloh avangin SP Conference Hall-ah hun hman a ni a, he hunah hian Serchhip SP, Stephen Lalrinawma MPS chuan Police Commemoration Day lo chhuahdan a tobul atanga sawiin, Police te chu he ni ngaihlu thar leh turin a chah a. Mipui tana rawngbawl an nih thu te leh an hnathawhna ah huaisen tak leh dik taka thawk a, hawihhawm taka mipui rawng bawl tur an ni thu sawiin he huna tel te chu a fuih a ni.

Nimin-a Serchhip-a he hun hman hi Serchhip SDPO, Kaste Romalsawma chuan kaihruaiin kum kalta chhunga Police, an Duty laia hmelma kut-a boral te sunna hun hmangin ngawi rengin minute khat (1) an ding bawk a ni.

Police Commemoration Day hi Aizawl-ah chuan Chief Minister Zoramthanga hovin 1st Bn. MAP Headquarters, Armed Veng-ah hman a ni a, he hunah hian Mizoram DG SBK. Singh chuan India ram hmun hrang hranga nikum September 1 atanga kumin August 31 chhunga duty laia nunna chan State tin in a neih zat a chhiar chhuak a, kumin ah hian Police boral mi 377 awmin Mizoram Police zingah duty laia hmelma kuta thi an awm lo a. Duty laia COVID-19 avanga thi mi 6 awmin, chung mite hming chu chhiarchhuah tel a ni thung a. Hemi hnu hian Mizoram Police, duty laia hmelma kut tuara thi tawhte hriatrengna ‘Martar Thlan’ ah sunna leh zahna pangpar dah a ni bawk.

British hunlai atang tawhin India Police te hian Tibet leh India inrinna lai bawr mel 2500 zet an veng thin a, October ni 21, 1959 khan mahni ram venghim tura hnathawk (duty) mek India Police, Karam Singh, DCIO leh a hote Police mi 20 rual chu Aksai Chin pela ralthuam famkim nena rawn lut ru China sipai rualte chuan Hot Springs (Ladakh)-ah lambun in Automatic Rifle leh Grenade hmangin an lo bei a. A hmunah mi 10 thiin mi 7 chu hliam na tak tuarin China sipaite chuan an man a. Heng ram tana nunna chante ruang hi China sipai chuan 13th Nov. 1959-ah India kutah hlanin Ladakh-a Hot Springs-ah chawi-mawina famkim nen halral an ni ta a. Kum 1960 atang chuan 21st October chu 'Police Commemoration Day' atana ruat niin kumtin Police ram tana nunna hlante hriatrengna, sunna leh chawimawina hun atan an hmang ta thin a ni.