Chanchin thar thenkhat :

DISHA Meeting neih a ni

Nimin khan Lunglei-ah District chhunga Central Sawrkar sum hmanga hmasawnna hna-thawh hrang hrangte enzuitu, District Development Co-Ordination and Monitoring Committee (DISHA) chu an Chairman, Mizoram Lok Sabha MP C. Lalrosanga hovin Virtual Meeting neiin an thukhawm a, he hunah hian Sawrkar laipui Scheme kalpui dan hrang hrang te thlirho a ni a, Lok Sabha MP chuan Sawrkar laipui Scheme thlirletna hun hman chuan thawhhona tha zawk leh inhriatpuitawnna a thlen thu a sawi a ni. He hunah hian PMAY-G hnuaiah In sak tanpuina dawng thei chhungkaw 1742 an awm thu te, Pre-School naupang kum 3-6 inkar 8015 an awm thu leh Indira Gandhi National Old Age Pension Scheme hnuaia kum 80 chunglam mi 1410 te hnenah Rs. 600/- leh kum 60- 79 mi 5380 te hnenah Rs. 300/- thlatin tanpuina pek thin an nih thu te tarlan a ni.

Inthlan atan inbuatsaih zel

Tun thla ni 30-a Tuirial Bial Assembly bye-election neih tur atana inbuatsaihna kal mekah nimin khan Polling Station tin a duty tur, Nodal Health Officer leh Covid Nodal Officer-te mawh-phurna inhrilhhriatna chu Kolasib I&PR Conference Hall-ah neih a ni a, ruahmanna siam dan chuan Polling Station te chu Vote thlak hmaa tih thianghlim vek tur niin Vote thlak turte chu Polling Station hung chhung an luh dawnah Covid Nodal Officer-ten Thermal Scanner hmangin an enfiah vek anga, Vote thlak turte dinna tur inkar-hlat-a siam tur niin Kut silna pawh chhawp a ni anga, First Polling Officer-in Voter-te kut pahnih ah Sanitizer in an kap (Spray) zel dawn a ni.

Cake siam zirna zofel

Mizoram thalai State pawn-a hna thawk, hri leng avanga Mizoram-a rawn haw leh hnathawh tur mumal neilote tana MYC in Lawngtlai-a Cake Baking Training a buatsaih chu nimin khan zawh-fel a ni a, tun tumah hian mi 21 ten training hi neiin tha takin an pass chhuak vek a ni.

Panel Member ah ruat thar

BJP Mizoram State Secretary Lalthangmawii chu Ministry of Information & Broadcasting (I&B), Govt. of India Advisory Pannel Member atan ruat thar a ni tih BJP Mizoram Pradesh chuan sawiin, anni hian NE huamchhunga Film siam reng reng endik leh Approval pek hna te an thawk dawn tih an sawi bawk.

Bialtu MLA in hmanpui

Aizawl Salem Veng Branch YMA in zirlai titha chawimawina hun nizan hmasa a an buatsaih chu bialtu MLA, Lalchhuanthanga chuan hman-puiin Education chu kawng tinrengah hnathawk theia min siamtu a ni tih sawiin, “Lehkha kan zir ta rau rau, hnamdang el pha tura kan quality kan siam chhoh a pawimawh a ni,” a ti bawk.

Kawng khar leh rih dawn

Hmuifang leh Chawilung inkar RCC pavement chu kawng khuar a tam deuh tawh avanga lirthei tan tlan a hrehawm tan avangin Mizoram Technocrats Company te chuan October 27 leh 29 chhung hian kawng siamthat hna, Cement Work an thawk dawn a. Kawng hmangtute him nan leh hnathawktu ten tluang tak leh ngawrh taka an thawh theih nan October 27 atanga 29 chhung hian Hmuifang leh Chawilung inkar kawng hi khar a ni dawn a ni. He thupek hian chhiatrupna thil, kangmei leh emergency kaih-hnawih a duty, dan leh thupek pawimawh bik a Police leh Magistrate duty te chet velna a huam lo ang.

Aieng phut, Hmarcha Phut leh Hmunphiah tlangzarh

Siaha District-a Pradhan Mantri Vandhan Yojona Scheme (PMVYS) atanga tharchhuah Aieng phut, Hmarcha Phut leh Hmunphiah (Organic Turmeric Powder, Chilli Powder & Broom) chu zawrhchhuah theih turin nimin khan tlangzarh a ni a, tunah hian Aieng phut leh Hmarcha Phut 50gram ve ve a pack chu Rs.20/- a zawrhchhuah niin Hmunphiah pawh phiahkhat Rs.50 a hralhchhuah a ni bawk.

MADC-ah Pisa kai tur la dang

Mara Autonomous District Council (MA-DC) Sawrkar in Advertisement chhuah lova hna-thawktu engemaw zat a lak avanga mara Students Organisation (MSO) in niminpiah atanga MSDC Staff te Pisa kai tur an dan chu nimin khan chhunzawm leh a ni a, hnathawktu lak zinga mi pathum te banna thupek tihchhuah a ni tawh nia thudawn a ni bawk. Hetianga MSO ten Pisa kai tur an dan chungchangah hian ECM Kohhran hruaitute leh MTP Hqrs. hruaitute chuan inremna kawng dapin hma an la mek a, MADC-a CEM N. Zakhai leh a thawhpui te pawh be mahse in-remna ala awm theilo thung a ni.

MSO hian kum 2020-2021 inkara MA-DC-a Advertisement chhuah lova, Sawrkar hna an lak te list pe tura  RTI hmanga an dil chu pek an ni lo tih an sawi a ni.