Mizoram-ah hri kai hmuhchhuah tlahniam zel

Mizoram-ah COVID-19 hri kai hmuhchhuah an tlahniam hret hret ve zel a, niminpiah khan Sample 8264 enfiah niin heng atang hian hri kai mi 741 hmuh niin Sample enfiah atanga za zela 8.97 te chuan hri an kai a ni.

Niminpiah khan ZMC-a RT-PCR Laboratory-ah Sample 691 enfiah niin heng atang hian COVID-19 hri kai mi 125 hmuhchhuah an ni a, an vai hian Aizawl District-a Sample lak te niin Veng leh khua 30 ami te an ni a, hri kai hmuhchhuah tamna ber Zemabawk-ah hri kai mi 32 hmuh niin hei bak hi Veng khat-a hri kai mi 10 aia tam hmuhna a awmlo a ni. Fluorescent Immunoassay Test hmangin Aizawl-ah Sample 41 enfiah ni bawkin hri kai mi 15 hmuh an ni bawk a, an vai hian Aizawl khawpui chhung ami te vek an ni bawk.

District hrang hranga TrueNat Laboratory 11-ah niminpiah khan Sample 377 enfiah niin heng atang hian COVID-19 hri kai mi 43 hmuh an ni bawk a, an zinga mi 10 te chu Champhai District ami te niin Lawng-tlai leh Khawzawl District-ah mi 6 ve ve, Aizawl leh Hnahthial District-ah mi 5 ve ve, Serchhip District-ah 3 leh Lunglei, Siaha, Kolasib leh Mamit District-ah mi pahnih theuh hmuhchhuah an ni bawk.

Niminpiah khan Rapid Antigen Test hmangin Mizoram-ah Sample 7155 enfiah ni leh bawkin heng atang hian COVID-19 hri kai mi 558 hmuh an ni a, an zinga 188 te chu Aizawl District-a hri kai hmuhchhuah te niin Serchhip District-ah 77, Siaha District-ah 61, Lunglei District-ah 60, Champhai District-ah 57, Kolasib District-ah 46, Mamit District-ah mi 40, Hnahthial District-ah 16 leh Lawngtlai District-ah hrikai mi 13 hmuhchhuah an ni bawk.

Mizoram-a COVID-19 hri kai enkawl zingah nimin tlai dar 5:00 thleng khan mi 532 te enkawl dam ni lehin Mizoram-a hri kai enkawllai pawh mi sing khat aiin an tlem leh ta a. Nimin tlai dar 5:00 thleng khan Mizoram-a hri kai hmuhchhuah chu 1,15,207 niin an zinga 1,05,080 te chu enkawl dam ni tawhin hei hi hri kai hmuhchhuah atanga chhutin za zela 91.20 a ni a, hri kai enkawllai 9727 an la awm mek a ni.

Hetihlai hian Mizoram-a COVID-19 hri kai zingah mi 400 zet an boral tawh thung a, niminpiah khan hri kai boral mi pakhat chhinchhiah belh awmin nimin lamah nizan dar 8:00 thleng khan hri kai boral mi 3 lai chhinchhiah belh an awm leh a ni.