Mizoram-ah hri kai 790 hmuh belh leh an ni

Niminpiah khan Mizoram-ah Sample 8380 enfiah leh niin heng atang hian COVID-19 hri kai mi 790 hmuh leh an ni a, Sample enfiah atanga za zela 9.43 te chuan hri an kai a ni.

Niminpiah khan ZMC-a RT-PCR Laboratory-ah Aizawl District atanga Sample lak 582 enfiah niin heng atang hian hri kai mi 89 hmuhchhuah an ni a, Veng leh khua 33 ami te niin Darlawn-ah hri kai mi 10 hmuh niin Veng leh khaw mal-a hri kai hmuhchhuah tamna ber a ni. Hei bakah hian Fluorescent Immunoassay Test hmangin Aizawl District-ah Sample 59 enfiah ni bawkin heng atang hian hri kai mi 13 hmuhchhuah an ni a, a vai hian Aizawl khawpui chhung ami te vek an ni bawk.

Heng bakah hian District hrang hrang 9-a TrueNat Laboratory ah Sample 262 enfiah ni bawkin heng atang hian hri kai mi 45 hmuh an ni bawk a, an zinga 15 te chu Champhai District atanga hri kai hmuh te niin Lunglei District-ah 14, Mamit District-ah 6, Lawngtlai District-ah 4, Khawzawl leh Hnahthial District-ah mi 2 ve ve leh Kolasib leh Saitual District-ah mi pakhat ve ve te an ni.

Rapid Antigen Test hmangin niminpiah khan Sample 7477 enfiah leh a ni bawk a, heng atang hian hri kai 643 hmuh niin an zinga 207 te chu Aizawl District ami te an ni a, Sailam khua ah hri kai mi 17 lai hmuh an awm a ni. Lunglei District-ah pawh hri kai mi 154 hmuh an ni bawk a, Serchhip District-ah hri kai mi 115 hmuh niin Lawngtlai District-ah 41, Hnahthial District-ah 35, Siaha District-ah 31, Kolasib District-ah 27, Mamit District-ah 25, Saitual District-ah 5 leh Khawzawl District-ah mi 3 te an ni.

Mizoram-a hri kai te zingah nimin khan tlai dar 5:00 thlengin mi 766 enkawl dam niin heti hian nimin tlai dar 5:00 thlenga Mizoram-a hri kai hmuh tawh chu 1,18,209 niin an zinga 1,10,468 te chu enkawl dam an ni tawh a, hri kai zinga za zela 93.45 te chu enkawl dam ni tawhin hei kai enkawllai 7322 an la awm a, nimin khan hri kai zingah mi 7 lai boral lehin Mizoram-a hri kai zingah mi 421 zet an boral tawh a ni.