Serchhip Sub-Hqrs. YMA VMC hmalakna Bialtu MLA in tha a tih thu leh entawntlak a tih thu a sawi

Serchhip bialtu MLA Lalduhoma chuan a bial chhunga hmasawnna hnathawh tha taka a kal theih nan tlawmngai pawl te nen en ho thin a duh thu sawiin, hemi kawnga Serchhip Sub-Hqrs. YMA Vigilance & Monitoring Committee hmalakna chu tha a tih thu leh entawntlak a tih thu a sawi.

Thenzawl Bazar Veng Branch YMA kum 25 tlinna, Silver Jubilee lawmna leh zirlai titha lawmpuina hun nimin-a Vantawng Group YMA Run, Thenzawl-a neih a hmanpuina ah he thu hi sawiin Serchhip bialtu MLA chuan PWD leh Central YMA thawhhona angin YMA ten hmun hrang hrangah kawng siam an endik thin chu tha a tih thu leh tangkai a tih thu sawiin, a bial chhunga hmasawnna hrang hrang hnathawh te pawh a hova en thin a duh thu leh chutiang tura Party ang zawng ni lova, NGO te nen hmalak a duh thu a sawi a, NGO te thawhpuina ngenin, a bial chhunga hmasawnna hnathawh tha taka a kal theih nan enho thin a duh thu a sawi a. “In zarah MLA a thlantlin ka ni leh ta a, kan bial-ah hian eng hna pawh thawk ila, a chhawrtu chu keimahni tho kan nih avangin a that leh that loh thuah te, enkawl chungchang thlengin kan kutah a awm a ni tih ka hriat a pawimawh,” a ti bawk.

Serchhip bialtu MLA chuan kan pi leh pu te huna khawtlang nun kaihruaitu pawimawh chu Zawlbuk leh Val upa-te an ni tih sawiin, “Kan ram a Kristianna a lo luh hnuah kan nunphung a lo danglamin nasa takin hma kan sawn a, Kohhran inenkawlna dan ringawt chuan kan nun dan a huapzo lo deuhin an hria a, YMA an din ta a ni,” a ti a. “YMA hi Kohhran din liau liau a ni a. YMA-ah chuan pawl ram a awm lova, Mizote kan vanneiin khawtlang leh ramin chhiat that a tawh pawhin an tel lovin kan awm thei lo a ni. Thenzawl khuaah pawh YMA te inrelbawlna kawngah a kungpui kan ni a, Vawiin-a Bazar Branch YMA-in Silver Jubilee lungphum hial kan phum thei ta hi a lawmawm takzet a ni,” a ti bawk.

Lalduhoma chuan Vawiin-a zirlaite chu an vannei takzet tawh tih pawh sawiin, “Zirna tha leh changtlung tak a awm tawh avangin hlawhtlinna chu kan kuta innghat liau liau a ni,” a ti a, Zirna-ah Moral Subject telh hi thil pawimawh tak a ni tih sawiin, Mizo nunze mawi, aia upa zah leh tlawmngaihna inzirtir thar a tul thu a sawi a, Mizo Nationalism chu Sikul atanga zira, Thluak-a tuh a tul tih a sawi bawk.

Thenzawl Bazar Branch YMA Silver Jubilee lungphum hawnna leh HSLC leh HSSLC-a zirlai ti thate chawimawina hun hi an Branch YMA President, Chawngsangliana chuan kaihruaiin an Branch YMA huamchhunga HSLC leh HSSLC exam-a Distinction leh First Division a pass zirlai te chawimawina leh lawm-puina hlan an ni a, he hunah hian an Branch hruaitute hlui bakah Thenzawl West VCP R. Lalramnghaka ten thu an sawi bawk a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result