Chanchin thar thenkhat :

CS mawhphurhna hlan

Mizoram Chief Secretary Lalnunmawia Chuaungo IAS chu tun thla tawp-ah Voluntary Pension-a a chhuah dawn tak avangin nimin khan Addl. Chief Secretary nilai, JC. Ramthanga IAS hnenah Chief Secretary mawhphurhna a hlan ta a, JC. Ramthanga hian Chief Secretary tura Home Ministry in a ruat, Renu Sharma-i rawn zawm hma chu Chief Secretary mawhphurhna hi a lo chelh lailawk dawn a ni. Chief Secretary kalchhuak ta Lalnunmawia Chuaungo hi tun thla ni 20 khan Chief Information Commissioner atan ruat thar a nih thu Mizoram sawrkar-a General Administration Department chuan hriattirna a lo chhuah tawh a, hun reilote ah CIC thar atan lakluh a nih beisei a ni.

Tuirial bial-ah Vote thlak dawn

Tuirial bial-a Assembly bye-election neih tur atan Vawiin hian mipui ten Vote an thlak dawn ta a, inbuatsaihna engkim peihfel a ni tawh. He inthlanna a Duty tur Polling Party te chuan nimin khan an Duty-na tur an pan kim tawh a, tukin dar 7:00 atang hian Vote thlakna hun hawngin tlai dar 6:00 thleng Vote hi thlak a ni anga, dar 5:00 hnu lam hi Sabath Serh te tan a zuah deuh tura tih a ni a, Covid vei zingah Vote thlak duh an awm chuan mipui vote thlak zawh lama thlak tur a ruahmanna siam a ni bawk. Tuirial bial-ah hian Polling Station 27 a awm a, Polling Station tinah hian EVM Set khat zel dahin, EVM chhiat palh thulha hman tur EVM Set 14 chu dah a ni a. He bial-ah hian Vote nei 17,911 awmin mipa 8819 leh hmeichhia 9092 an ni a. Polling Station zingah Tripura a awm mek Bru ten Vote an neihna Zodin leh Hortoki-II te chu venhim ngai bikah ngaih a ni.

Raltlan rawn luh belh zel

Myanmar rama buaina thleng avangin Mizo-ram-ah nimin thleng khan raltlan an la rawn luh belh zel a, Siaha District-ah chuan ramri hnaih a khua Chapi kaltlangin mi 1600 vel an rawn lut tawh a, Hnahthial District-ah pawh raltlan hi 2,343 zet an rawn lut tawh bawk a ni.

Lawngtlai DC in hlan

Lawngtlai Bawrhsap Dr. Andrew H. Vanlal-dika hmalaknaa Northeast Centre for Equity Action on Integrated Development (NEAID), Guwahati atanga COVID-19 hri leng dona atana hmanraw mamawh a dil chhuahte chu nimin khan Lawngtlai CMO leh an khawpui chhunga damdawi In pathum ah te hlan a ni a, heng bungrua te hi Rs. 1,50,000/- hu vel niin PPE, Mask, Hand Sanitizer leh Oxymeter bakah hmanraw dang te a ni.

MCSA Conference neih a ni

Mizoram Civil Service Association (MC-SA) chuan nimin khan Aizawl-a Synod Conference Centre-ah General Conference vawi 45-na hmangin Deputy Chief Minister Tawnluia chuan a hmanpui a, MCS Officer te chu State Administration-ah a kul a taia sawrkarin a hman an ni tih a sawi. He hunah hian MCS thi mi 15 te sunna hun hmangin Chief Minister Awardees mi 2 lawmpuina hlan an ni bawk.