Therhlo nena Tuikuk ten vote an thlak theihna tura ruahmanna siam an awm niin YMA in an hria

Central YMA chuan Election Commission of India duhdan kalha, therhlo nena Tuikukte vote thlak theihna tura ruahmanna siam Political Party an awm nia an hriat thu sawiin, hei hi pawi an tih thu leh Tripura-a Tuikuk te tana vote thlakna hranpa siam chu remchang lovah an ngai tih an sawi.

Central YMA Central Executive Committee (CEC) chuan nimin, Oct. 24, 2021 khan Aizawl-ah thutkhawm hmanhmawh neiin tun thla ni 30-a Tuirial Assembly Constituency Bye-Election neih tur chungchang an thlirho a, tun thla ni 2-a CEC thukhawm in a lo rel tawh chu an dinna a la ni reng tih sawiin, “Tripura State-a anmahni duhthu ngeia tlan thla Tuikuk te vote an thlak dawn a nih chuan, Mizoram-a an chuanna Electoral Roll awmna hmun ngeiah anmahni senso in vote an thlak tur a ni,” tiin Tripura a Tuikuk te tana vote thlakna hranpa siam chu remchang lovah an ngai tih an sawi a ni.

CEC thutkhawm chuan Election Commission of India duhdan kalha, therhlo nena Tuikuk te vote thlak theihna tura ruahmanna siam Political Party an awm nia hriat a nih thu pawh sawiin, hei hi YMA chuan pawi a ti hle tih an sawi a. Mizo mipuite leh Political Party-te chu hemi kawnga hma la lo turin an ngen tak meuh meuh tih an sawi a, Tuikuk te sum pe zawng leh an kalna tur buaipuitute hi YMA chuan, Mizo hnam pawikhawihtu ah a ngai tih sawiin, Tuirial Bial Assembly Bye-Election hi dik taka kalpui a nih theih nan, a tul a nih chuan YMA chuan Hortoki leh Zodin Polling Station-ah viltu thahnem tak a ruat dawn tih an sawi bawk a ni.

Hetihlai hian tunkar Inrinni-a Tuirial Assembly Constituency bye-election neih turah Election Commission of India (ECI) chuan Tripura Relief Camp-a Bru awm, Mizoram Electoral Roll-a chuangte vote thlak dan turah thutlukna siam a la nei lo nia thudawn a ni a. Mizoram-a Political Party pathum MNF, Congress leh ZPM te chuan ECI-ah ngenna thlenin,Tripura-a inbengbel tawh, Tuirial bial-a Electoral Roll-a hming la chuang Bru-te vote thlak phalsak lo turin an lo ngen tawh a ni.

Hemi chungchangah hian thuthar theh-darhtute zawhna chhangin Election Department hotute chuan Bru-te vote thlakna tur chungchang ah ruahman a la awm loh thu an sawi a, Vote an neihna Polling Booth-ah ngei vote thlaktir an ni dawn nge, an awm mekna Relief Camp-ah vote an thlak dawn tih sawi theih a la nih loh thu an sawi a ni. Tuirial bial-ah hian Bru vote nei mi 663 an awm a, chung mite hi Hortoki Polling Station-ah voters 176 leh Zodin (Rastali)-ah voters 487 te an ni.

Comments

Popular News (Last 30 Days)

Vawiin-ah HSLC result

SDVA in hruaitu tur thlang