Latest News

Mizoram-a Sub-Centre 275 te Health & Wellness Centre-ah hlankai a ni tawh

Health Minister Dr. R. Lalthangliana chuan Sub-Centre tia sawi thin te chu Health & Wellness Centre-ah hlankai (upgrade) mek a nih thu sawiin, tunah hian Sub-Centre 275 upgrade a nih tawh thu a sawi.

'Mizoram Hriselna Kailawn Dawhtute' tih lehkhabu Dr. B. Thangdailova ziah tlangzarhna inkhawm nimin-a Aizawl Civil Hospital Conference Hall-a neih ah he thu hi Health Minister chuan sawiin, COVID-19 hripui leng avangin Health Department in hmachhawp a neih tam takah hma a lak chunzawm theih loh thu a sawi a, hripui leng dona kawnga hmalakna ah sum leh pai tam tak mamawh thin a nih thu leh Finance Department in Zoram dam nan an mamawh apiang an tihhlawhtlin sak thin avangin lawmthu a sawi a, hetih rual hian Mizoram budget khawih buai si lovin sawrkar laipui atanga Scheme hrang hrang NESIDS etc., leh PM Cares bakah World Bank leh JICA atang in project tha tak tak Zorami-n hriselna lama hma a sawnna tur kan thawk reng theite hi thil lawmawm tak a ni, a ti.

Health Minister chuan Sub-Centre tia sawi thin pawh Health & Wellness Centre-ah hlankai (upgrade) mek a nih thu sawiin, tunah hian Sub-Centre 275 upgrade tawhin Sub-Centre 80 vel upgrade hmabak an la nei tih a s awi a, heng Centre te hi sawrkar laipui duhdan angin Health & Wellness Officer train chhuah ten an enkawl vek a, tunah hian World Bank Project kan hmuh Mizoram Health Strengthening System kaltlangin cheng vbc. 280 hmangin tihphuisui chhunzawm leh a ni dawn a, kum 5 hnuah hmel danglam dawrh khawpin hma kan sawn a beisei thu a sawi bawk. Hei bakah hian JICA tanpuina a Cancer Superspeciality Hospital sak turte, NESIDS hnuaia ZMC tihmasawnna te leh PM Cares hnuaia District tina Oxygen Plant dah a nih thute bakah hmalakna chi hrang hrang a tarlang a ni.

'Mizoram Hriselna Kailawn Dawhtute' tih lehkhabu-ah hian Kumpinu hunlai (1890-1947) atanga District Council, Union Territory leh State kan nih hnu tun thlenga Mizoram-a hriselna kawnga hma kan sawn dan kimchang taka tarlan niin Bu khat Rs. 250/- man a ni.

Comments

Popular News (Last 30 Days)