C&I Minister hovin sawiho

Mizoram-a tualtah puan (Handloom), Them thil siam (Handicrafts) leh mau hmanga thil siam-chhuah chungchangah thil kalpui mek leh hmalakna thar awm thei te sawiho chu nimin khan Commerce & Industries Minister Dr. R. Lalthangliana hovin neih a ni.

SAD Conference Hall-a sawihona ah hian Dr. R. Lalthangliana chuan hripui lengin kawng tinrengin sum leh pai dinhmun leh sum dehchhuahna a bik takin industry leh a kaihhnawih te a khawih buai nasa a, hmalak a har a, chuvangin awlsam deuh leh rang taka thil tih theih, hlawh-tling ngei ngei tur thil tlemte, Sector 2 emaw 3 emaw a inthlurbinga hmalak a tul tih a sawi a. Tualtah puan, Them thil siam leh mau hmanga thil siamchhuah lama hmalakna thar ngaihtuah tura Meeting chu koh anih thu a sawi a ni.

C&I Minister chuan thla hmasa a Delhi lama Ministry of Textiles leh Ministry of Micro, Small & Medium Enterprises te a dawrna ah hmalakna thar awm thei nia a hmuh thu leh heng Ministry te pawh an in hawn thu a sawi a. Chutiang zulzuia hmalakna tur Concept Note leh DPR te rang taka siam turin Meeting a tel Commerce & Industries officer te leh Bamboo Development Agency (BDA) hnathawk te chu a chah a. Proposal an siamah eizawnna tling a ni em tih te, hralhchhuahna market a awm tha em tih te leh eizawnna thar engzah nge a siam-chhuah theih tih te chu ngaipawimawh turin a chah bawk.

Meeting-ah hian Commerce & Industries Department hnuaia Handloom leh Handicrafts enkawltu Officer ten Scheme an kalpui mek dinhmun te tarlangin hmalakna thar awm thei nia a ngaih te an sawi zau a. BDA lamin mau hmanga thil siamchhuahna lamah hmalakna an neih te sawiin, heng Sector 3-a hmalakna thar awm thei te chu zau taka sawiho a ni a. Inkharkhipna tum engemawzat neih avanga puantaha eizawng-tute harsatna tawh mek pawh sawilan a ni bawk.